ന്യൂഡൽഹി : ടോക്യോ ഒളിമ്പിക്സിലെ വെള്ളിമെഡൽ ജേതാവ് മീരാഭായ് ചാനുവിനെ പ്രശംസിച്ച് പ്രധാനമന്ത്രി നരേന്ദ്ര മോദി. ഒളിമ്പിക്സിൽ പങ്കെടുത്ത ഇന്ത്യൻ കായികതാരങ്ങളുമായി നടത്തിയ കൂടിക്കാഴ്ച്ചയിലായിരുന്നു പ്രധാനമന്ത്രിയുടെ പ്രശംസ. ട്രെയിനിംഗിനു വേണ്ടി പോകുമ്പോൾ തനിക്ക് ലിഫ്റ്റ് തന്നിരുന്ന ട്രക്ക് ഡൈവർമാരെ ചാനു ക്ഷണിക്കുകയും അവരോടൊപ്പം ഭക്ഷണം കഴിക്കുകയും ചെയ്തിരുന്നു. ഇത് ഓർമ്മിപ്പിച്ചു കൊണ്ടായിരുന്നു പ്രധാനമന്ത്രിയുടെ പരാമർശം.
“മെഡൽ നേടിയതിൽ എല്ലാവർക്കും അഭിമാനമുണ്ട്. എനിക്കും അഭിമാനവും സന്തോഷവുമുണ്ട്. പക്ഷേ എനിക്ക് മറ്റൊരു കാര്യത്തിലും അതീവ സന്തോഷമുണ്ട്. നിങ്ങൾ നിങ്ങളെ സഹായിച്ച ഡ്രൈവർമാരെ ഓർത്തു. അവരെ ആദരിച്ചു. അത് വലിയൊരു കാര്യമാണ്. ഒരു മഹത്തായ സംസ്കാരത്തിന്റെ ഉദാഹരണമാണത് “ കയ്യടികൾക്കിടയിൽ പ്രധാനമന്ത്രി ചാനുവിനോട് പറഞ്ഞു.
വീട്ടിലെത്തിയപ്പോൾ ആദ്യം എന്ത് ചെയ്തെന്ന പ്രധാനമന്ത്രിയുടെ ചോദ്യത്തിന് ചാനു നൽകിയ ഉത്തരവും ചിരി പടർത്തി. അമ്മയുടെ കൈ കൊണ്ടുണ്ടാക്കിയ ഭക്ഷണം കഴിക്കുകയായിരുന്നു ആദ്യം ചെയ്തതെന്ന് ചാനു ചിരിയോടെ പറഞ്ഞു. പ്രധാനമന്ത്രിയും കൂടെ നിന്നവരും ഇത് കേട്ട് ചിരിക്കുന്നുണ്ടായിരുന്നു. മീരാഭാ ചാനുവിന്റെ കോച്ചിനേയും പ്രധാനമന്ത്രി അഭിനന്ദിച്ചു.
Comments