ന്യൂഡൽഹി: ഇന്ത്യയിൽ ഇതുവരെ 60 കോടി വാക്സിൻ ഡോസുകൾ വിതരണം ചെയ്തതായി കേന്ദ്ര ആരോഗ്യമന്ത്രാലയം. പ്രധാനമന്ത്രിയുടെ എല്ലാവർക്കും സൗജന്യ വാക്സിൻ പദ്ധതിക്ക് കീഴിലാണ് 60 കോടി ഡോസുകൾ നൽകിയതെന്നും കേന്ദ്ര ആരോഗ്യമന്ത്രി മൻസൂക് മാണ്ഡവ്യ അറിയിച്ചു.
ആദ്യത്തെ പത്ത് കോടി വാക്സിൻ ഡോസുകൾ വിതരണം ചെയ്യാൻ 85 ദിവസമാണ് വേണ്ടിവന്നത്. അടുത്ത പത്ത് കോടി നൽകാൻ 45 ദിവസവും അടുത്തതിനായി 29 ദിവസവും ആവശ്യമായി വന്നു. ഇത്തരത്തിൽ ആദ്യത്തെ മുപ്പത് കോടി വാക്സിൻ ഡോസുകൾ പൂർത്തിയാക്കാൻ 159 ദിവസങ്ങൾ വേണ്ടി വന്നപ്പോൾ വെറും 63 ദിവസങ്ങൾ കൊണ്ടാണ് അടുത്ത മുപ്പത് കോടി ഡോസുകൾ വിതരണം ചെയ്തതെന്നും ആരോഗ്യമന്ത്രി അറിയിച്ചു.
രാജ്യവ്യാപകമായ കൊറോണ പ്രതിരോധ കുത്തിവെയ്പ്പ് ജനുവരി 16നാണ് ഇന്ത്യയിൽ ആരംഭിച്ചത്. ആദ്യഘട്ടത്തിൽ ആരോഗ്യപ്രവർത്തകർക്ക് നൽകുകയും ഫെബ്രുവരി രണ്ടോടെ മുൻനിര കൊറോണ പോരാളികൾക്ക് ലഭ്യമാക്കുകയും ചെയ്തു. മാർച്ച് ഒന്നുമുതലാണ് 60 വയസിന് മുകളിലുള്ളവർക്കും 45ന് മീതെ പ്രായമുള്ള ഗുരുതര രോഗബാധിതർക്കും വാക്സിനേഷൻ ആരംഭിച്ചത്. അടുത്ത ഘട്ടത്തിൽ 45 മുകളിലുള്ള എല്ലാവർക്കും ഏപ്രിൽ ഒന്നുമുതൽ കുത്തിവെയ്പ്പ് നടത്തി. 18ന് മുകളിൽ പ്രായമുള്ളവർക്ക് മെയ് ആദ്യം മുതൽ വാക്സിനേഷൻ രജിസ്റ്ററേഷനും ആരംഭിച്ചു.
പദ്ധതി പ്രകാരം എല്ലാ സംസ്ഥാനങ്ങൾക്കും പ്രതിമാസം വിതരണം ചെയ്യുന്ന വാക്സിന് പുറമേ രണ്ട് കോടിയിലധികം ഡോസുകൾ ഓഗസ്റ്റിൽ നൽകിയെന്നും മാണ്ഡവ്യ അറിയിച്ചു. സെപ്റ്റംബർ അഞ്ചിന് രാജ്യത്ത് അധ്യാപകദിനം ആചരിക്കുന്നതിന് മുന്നോടിയായി എല്ലാ സ്കൂൾ അധ്യാപകർക്കും മുൻഗണന നൽകി കുത്തിവെയ്പ്പെടുക്കാൻ സംസ്ഥാനങ്ങളോട് നിർദേശിച്ചതായും ആരോഗ്യമന്ത്രി കൂട്ടിച്ചേർത്തു.
അതേസമയം കഴിഞ്ഞ 24 മണിക്കൂറിനുള്ളിൽ രാജ്യത്ത് 37,593 കൊറോണ കേസുകളും 648 മരണങ്ങളുമാണ് സ്ഥിരീകരിച്ചത്. ഇതിൽ 24,296 പോസിറ്റീവ് കേസുകളും കേരളത്തിൽ നിന്നുള്ളതാണ്.
