വാഷിംഗ്ടൺ: ക്രാഷ് ടെസ്റ്റിൽ ദയനീയ പരാജയം ഏറ്റുവാങ്ങി മെയ്ഡ് ഇൻ ഇന്ത്യ സ്വിഫ്റ്റും റെനോ ഡസ്റ്റർ എസ്.യു.വി പതിപ്പും . മാരുതി സുസുക്കിയുടെ ഏറ്റവും ജനപ്രിയ കാറുകളിലൊന്നായ സ്വിഫ്റ്റ് ഹാച്ച്ബാക്കും ഫ്രഞ്ച് ഓട്ടോ ഭീമനായ റെനോ അടുത്തിടെ പുറത്തിറക്കിയ ഡസ്റ്റർ എസ്യുവി പതിപ്പും ആണ് ക്രാഷ് ടെസ്റ്റിൽ പരാജയപ്പെട്ടത്.എൻസിഎപിയുടെ സൗത്ത് അമേരിക്കൻ അസോസിയേറ്ററായ ലാറ്റിൻ എൻസിഎപി അടുത്തിടെ നടത്തിയ ക്രാഷ് ടെസ്റ്റിൽ ആണ് ഇരു കാറുകളും പരാജയം ഏറ്റുവാങ്ങിയത്.
ന്യൂ കാർ അസസ്മെന്റ് പ്രോഗ്രാമിന് കീഴിലാണ് സ്വിഫ്റ്റ്,ഡെസ്റ്റർ ക്രാഷ് ടെസ്റ്റ് നടന്നത്.രണ്ടു കാറുകൾക്കും പൂജ്യം സ്റ്റാറുകളാണ് ലഭിച്ചത്.
മെയ്ഡ് ഇൻ ഇന്ത്യ സുസുക്കി സ്വിഫ്റ്റിൽ രണ്ട് എയർബാഗുകൾ സജീകരിച്ചിരുന്നു.എന്നാൽ ക്രാഷ് ടെസ്റ്റിനായി ഉപയോഗിച്ച ഈ കാറുകൾ എല്ലാ ടെസ്റ്റിലും മോശം പ്രകടനമാണ് കാഴ്ച വെച്ചത്.മുതിർന്നവർക്കുള്ള സുരക്ഷയിൽ 15.53 ശതമാനം മാത്രമാണ് സ്കോർ ചെയ്യാൻ സാധിച്ചത്.കുട്ടികൾക്കുള്ള സുരക്ഷയിൽ ഒരു സ്കോർ പോലും ലഭിച്ചതുമില്ല. കാൽനടക്കാർക്കും റോഡ് ഉപയോഗിക്കുന്ന മറ്റുള്ളവർക്കുമുള്ള സുരക്ഷയിൽ 66.07 % ആണ് സ്കോർ ലഭിച്ചത്.
സൈഡ് ഇംപാക്ട് പ്രൊട്ടക്ഷൻ, ടെസ്റ്റ് സമയത്ത് ഒരു ഡോർ തുറന്നത്, വിപ്പലാഷിന്റെ കുറവ് യുഎൻ32ന്റെ അഭാവം, എന്നിവയിൽ കുറഞ്ഞ സ്കോറുകൾ ലഭിച്ചതാണ് സ്വിഫ്റ്റിന്റെ നിരാശാജനകമായ പ്രകടനത്തിന് കാരണമായി പറയുന്നത്. സ്വിഫ്റ്റിന്റെ ക്രാഷ് ടെസ്റ്റ് ഫലം ഹാച്ച് ബാക്ക് പതിപ്പുകളെ കൂടാതെ സെഡാൻ പതിപ്പുകൾക്കും കൂടി ഉള്ളതാണെന്ന് എൻസിഎപി വ്യക്തമാക്കുന്നു.
സ്വിഫ്റ്റിന്റേയും റെനോ ഡെസ്റ്ററിന്റേയും മോശം പ്രകടനം നിരാശ ഉളവാക്കുന്നുണ്ടെന്ന് എൻസിഎപി സെക്രട്ടറി അലജാൻഡ്രോ ഫുറസ് ചുണ്ടിക്കാട്ടി.
