ന്യൂഡൽഹി: ഏത് ആകൃതിയിലുള്ള പപ്പടമാണെങ്കിലും അവയെ ജിഎസ്ടിയിൽ
നിന്നും ഒഴിവാക്കിയിട്ടുണ്ടെന്ന് കേന്ദ്ര പരോക്ഷ നികുതി ബോർഡ് (സിബിഐസി) വ്യക്തമാക്കി. പപ്പടവുമായി ബന്ധപ്പെട്ട് വ്യവസായി ഹർഷ് ഗോയങ്കയുടെ ട്വീറ്റിന് മറുപടിയായാണ് ബോർഡ് ഇക്കാര്യം അറിയിച്ചത്.
‘വട്ടത്തിലുള്ള പപ്പടത്തിനെ ജിഎസ്ടിയിൽ നിന്നും ഒഴിവാക്കിയിട്ടുണ്ടോ? എന്നാൽ ചതുരത്തിലുള്ള പപ്പടത്തിന് എന്തുകൊണ്ട് നികുതി നൽകണം? ഇതിന്റെ പിന്നിലെ യുക്തി മനസ്സിലാക്കാൻ ഒരു നല്ല ചാർട്ടേഡ് അക്കൗണ്ടിനെ ആരെങ്കിലും നിർദ്ദേശിക്കാമോ?’ ഇങ്ങനെയാണ് ഗോയങ്കയുടെ ട്വീറ്റ്.
‘അറിയപ്പെടുന്നത് ഏത് പേരിലായാലും, ഏത് ആകൃതിയിൽ നിർമ്മിക്കുന്നതായാലും പപ്പടത്തിനെ ജിഎസ്ടിയിൽ നിന്നും ഒഴിവാക്കിയിരിക്കുന്നു’ എന്ന് സിബിഐസി ഗോയങ്കയുടെ ട്വീറ്റിന് മറുപടി നൽകി.
മുംബൈ ആസ്ഥാനമായി പ്രവർത്തിക്കുന്ന ആർപിജി ഗ്രൂപ്പ് ചെയർമാനാണ് ഹർഷ് ഗോയങ്ക. അമേരിക്കൻ വ്യവസായ മാസികയായ ഫോബ്സ് പുറത്തു വിട്ട ലോകത്തിലെ ശതകോടീശ്വരന്മാരുടെ പട്ടികയിൽ 77ാമത്തെ ഇന്ത്യക്കാരനായി ഇടം നേടിയ വ്യക്തിയാണ് അദ്ദേഹം.
Comments