ടോക്കിയോ: പാരാലിമ്പിക്സിൽ മികച്ച നേട്ടം കൊയ്യാനെത്തിയ താരങ്ങളേയും മെഡൽ ജേതാക്കളേയും അഭിനന്ദിച്ച് ജപ്പാനിലെ ഇന്ത്യൻ സ്ഥാനപതി. പാരാലിമ്പിക്സിനെത്തിയ താരങ്ങൾക്ക് അത്താഴവിരുന്ന് നൽകിയാണ് ജപ്പാനിലെ ഇന്ത്യൻ സ്ഥാനപതി സഞ്ജയ് വെർമ ആദരിച്ചത്.
പാരാലിമ്പിക്സിൽ ഇന്ത്യൻ താരങ്ങൾ മികച്ച ആത്മവിശ്വാസമാണ് പ്രകടിപ്പിക്കുന്നത്. തൊട്ടുമുമ്പ് സമാപിച്ച ടോക്കിയോ ഒളിമ്പിക്സിൽ ഇന്ത്യ സർവ്വകാല നേട്ടം കൊയ്തതിലും സഞ്ജയ് ഏറെ സന്തോഷം പ്രകടിപ്പിച്ചു. കായികതാരങ്ങളെന്നും ഏതൊരു നാടിന്റേയും അഭിമാനവും പ്രേരണയുമാണെന്നും പാരാലിമ്പിക്സ് താരങ്ങൾ ഏറെ ശ്രമകരമായ നേട്ടങ്ങളാണ് കൊയ്യുന്നതെന്നും സഞ്ജയ് പറഞ്ഞു.
ഇന്ത്യൻ സംഘത്തിനൊപ്പം പാരാലിമ്പിക്സ് പ്രസിഡന്റ് ദീപ മാലിക്, ടോക്കിയോ ഗെയിംസിന്റെ പ്രത്യേക ചുമതലയുള്ള ഗുർഷരൺ സിംഗ് എന്നിവർക്കൊപ്പം മെഡൽ നേടിയ സുമിത് ആന്റിൽ, അവ്നി ലഖേര, യോഗേശ് ഖതൂനിയ, സുന്ദർ ഗുർജർ, ഭാവിന പട്ടേൽ എന്നിവരും ഇന്ത്യൻ സ്ഥാനപതിയുടെ അത്താഴവിരുന്നിൽ പങ്കെടുത്തു.
