മുംബൈ: പ്രശസ്ത ടെലിവിഷൻ സീരീസായ മണി ഹെയ്സ്റ്റിലെ ഗാനത്തിലെ സംഗീതം സമൂഹമാദ്ധ്യമങ്ങളിൽ അവതരിപ്പിച്ച് മുംബൈ പോലീസ്. ആരാധകരേറെയുള്ള ബെല്ല ചാവോ എന്ന് തുടങ്ങുന്ന ഗാനമാണ് പോലീസുകാർ പുനരാവിഷ്കരിച്ചത്.വീഡിയോ സമൂഹമാദ്ധ്യമങ്ങളിൽ പോസ്റ്റ് ചെയ്തതോടെ നിരവധി ആളുകളാണ് പോലീസുകാരുടെ പ്രകടനം ഏറ്റെടുത്തിരിക്കുന്നത്.
സ്പാനിഷ് ക്രൈം ഡ്രാമ ടെലിവിഷൻ സീരീസിന്റെ പുതിയ സീസൺ പുറത്തിറങ്ങിയതോടെ സീരീസുമാസി ബന്ധപ്പെട്ട പോസ്റ്റുകളാണ് സമൂഹമാദ്ധ്യമങ്ങൾ മുഴുവൻ. ഇതിനോടൊപ്പമാണ് മുംബൈ പോലീസുകാരുടെ മ്യൂസിക് ബാൻഡിന്റെ പുതിയ ആവിഷ്കാരം.
കണ്ടെത്തലുകളും ട്രെൻഡുകളും നഷ്ടപെടുത്താതിരിക്കാൻ എപ്പോഴും ശ്രമിക്കുന്നു. ഞങ്ങൾ എപ്പോഴും ഇവിടെ ഉണ്ടാകും. സുരക്ഷയുടെ സീസൺ അവസാനിക്കാൻ അനുവദിക്കില്ല.എന്നാൽ പാട്ടിന്റെ പുതിയ പതിപ്പ് നിങ്ങളുടെ ഹൃദയത്തെ കവർന്നേക്കാമെന്നാണ് പോസ്റ്റ് ചെയ്തു കൊണ്ട് പോലീസ് കുറിച്ചിരിക്കുന്നത്.
വീഡിയോ പോസ്റ്റ് ചെയ്ത് 24 മണിക്കൂറിനുള്ളിൽ തന്നെ ഒരുലക്ഷത്തിലധികം ആളുകളാണ് ഇതിനോടകം വീഡിയോ കണ്ടിരിക്കുന്നത്.നിരവധി പേർ സമൂഹമാദ്ധ്യങ്ങളിൽ പങ്കുവെച്ചിട്ടുണ്ട്.
നാല് സീസണുകൾ ഇതിനകം പൂർത്തിയാക്കിയ സിരീസിന്റെ അഞ്ചാമത്തേയും അവസാനത്തേയുമായ സീസണിന്റെ ആദ്യഭാഗം സെപ്തംബർ മൂന്നിന് റിലീസ് ചെയ്തിരുന്നു.രണ്ടാം ഭാഗം ഡിസംബർ മൂന്നിനാണ് റിലീസ് ചെയ്യുക.
