വില്ലന് കഥാപാത്രങ്ങളെ വെള്ളിത്തിരയില് അവതരിപ്പിച്ച് മലയാളികള്ക്ക് സുപരിചിതനായ ചലച്ചിത്രതാരമാണ് ടി ജി രവി. വര്ഷങ്ങള് നീണ്ടുനിന്ന സിനിമ ജീവിതത്തിനിടയില് ക്യാരക്ടര് റോളുകള് ചെയ്തും ടി ജി രവി മലയാളി മനസില് നിറഞ്ഞുനിന്നു. ഇപ്പോഴിതാ എഴുപത്തേഴാം വയസ്സില് അഭിനയത്തിനപ്പുറം നൃത്തത്തിലും ഒരു ചെറിയ പരീക്ഷണം നടത്തിയിരിക്കുകയാണ് അദ്ദേഹം. 1979 ല് പുറത്തിറങ്ങിയ പ്രഭു എന്ന ചിത്രത്തിലെ ‘ഇന്നീ തീരം തേടും തിരയുടെ പാട്ടിന്’ എന്ന പാട്ടിനാണ് ടി ജി രവി ചുവടുവെച്ചിരിക്കുന്നത്.
കുടുംബത്തിനൊപ്പം അത്യുത്സാഹത്തോടെ നൃത്തം ചെയ്യുന്ന താരത്തിന്റെ വിഡിയോ ഇതിനോടകം പ്രേക്ഷകര് ഏറ്റെടുത്തുകഴിഞ്ഞു. സജ്ന നജാം ഇന്സ്റ്റാഗ്രാം പേജിലൂടെ പങ്കുവെച്ച വിഡിയോയ്ക്ക് മികച്ച സ്വീകാര്യതയാണ് ലഭിച്ചു കൊണ്ടിരിക്കുന്നത്.അരവിന്ദന് സംവിധാനം ചെയ്ത ഉത്തരായനം എന്ന ചിത്രത്തിലൂടെ അഭിനയ ജീവിതം തുടങ്ങിയ അദ്ദേഹം പാദസരം, ചാകര തുടങ്ങിയ ചിത്രങ്ങളില് അഭിനയിച്ചു.
ചാകരയില് വില്ലനായി വേഷമിട്ട അദ്ദേഹം പിന്നീട് നിരവധി ചിത്രങ്ങളില് വില്ലന് വേഷങ്ങള് കൈകാര്യം ചെയ്തു. കുറച്ച് കാലങ്ങള്ക്ക് ശേഷം സിനിമാമേഖലയില് നിന്നും വിരമിച്ച അദ്ദേഹം സിബി മലയില് സംവിധാനം ചെയ്ത അമൃതം എന്ന ചിത്രത്തിലൂടെ വീണ്ടും സിനിമ ലോകത്ത് സജീവ സാന്നിധ്യമായി മാറി. മമ്മൂട്ടിക്കൊപ്പം അഭിനയിച്ച ദി പ്രീസ്റ്റാണ് ടി ജി രവിയുടേതായി അവസാനം പുറത്തിറങ്ങിയ ചിത്രം.
