മലയാളത്തിന്റെ പ്രിയനടൻ മമ്മൂട്ടി ഇന്ന് 70-ാം പിറന്നാൾ ആഘോഷിക്കുകയാണ്. വിവിധ കോണുകളിൽ നിന്നും നിരവധി പേരാണ് താരത്തിന് പിറന്നാൾ ആശംസകളുമായി എത്തിയത്. ആശംസകൾ നേർന്ന് കുഞ്ചാക്കോ ബോബൻ പങ്കുവെച്ച കുറിപ്പാണ് ഇപ്പോൾ ശ്രദ്ധനേടുന്നത്. മമ്മൂട്ടിയ്‌ക്കായി പ്രിയ ഡിസൈൻ ചെയ്ത കേക്കിന്റെ വിശേഷവും ചാക്കോച്ചൻ പങ്കുവെയ്‌ക്കുന്നുണ്ട്.
മമ്മൂക്കയുടെ ഏറ്റവും വലിയ ഫാൻ എന്നാണ് ഭാര്യ പ്രിയ പറയുന്നത്. മമ്മൂട്ടി തന്നെ സോഷ്യൽ മീഡിയയിൽ പങ്കുവെച്ച ചിത്രമാണ് പ്രിയ കേക്കിൽ പകർത്തിയിരിക്കുന്നത്. പ്രിയയുടെ ആശയത്തിന് അനുസരിച്ച് കേക്ക് ഒരുക്കിയത് ടിന അവിര കേക്ക്‌സ് ആണ്. പോസ്റ്റും കേക്കും സമൂഹമാദ്ധ്യമങ്ങിൽ വൈറലായിരിക്കുകയാണ്.
കുഞ്ചാക്കോ ബോബന്റെ കുറിപ്പ് ഇങ്ങനെ ‘ പ്രിയപ്പെട്ട മമ്മൂക്കാ… എനിക്കും എന്റെ കുടുംബത്തിനും അങ്ങെന്നും ഒരു ഉപദേഷ്ടാവും വഴിക്കാട്ടിയും അദ്ധ്യാപകനും ബിഗ് ബ്രദറുമൊക്കെയാണ്… എന്റെ സന്തോഷങ്ങളിൽ നിറ സാന്നിദ്ധ്യമായും കഷ്ടപ്പാടുകളിൽ ആശ്വാസമായും എപ്പോഴും കൂടെയുണ്ടായിരുന്നു. മമ്മൂക്കയോടുള്ള എന്റെ സ്‌നേഹവും ബഹുമാനവും അനുദിനം വളരുന്നു.
സിനിമയുടെ ലോകത്തേയ്‌ക്ക് പ്രവേശിക്കാൻ ആഗ്രഹിക്കുന്നവർക്ക് നിത്യ പ്രചോദനവും മാതൃകയുമാണ് നിങ്ങൾ. കലയോടുള്ള സ്‌നേഹവും അഭിനിവേശവും എപ്പോഴും ഞങ്ങളെ വിസ്മയിപ്പിക്കുന്നു. ഇപ്പോൾ മധുരപ്പതിനേഴിലെത്തിയിരിക്കുന്നു…ദൈവം അനുഗ്രഹിക്കട്ടെ പ്രിയപ്പെട്ട മമ്മൂക്കാ.. ജന്മദിനാശംസകൾ’ കുഞ്ചാക്കോ ബോബൻ കുറിച്ചു.
