ജമൈക്ക: ലോകക്രിക്കറ്റിലെ ഇതിഹാസതാരങ്ങളിലൊരാളായ മൈക്കിൾ ഹോൾഡിംഗ് അന്താരാഷ്ട്ര ക്രിക്കറ്റ് കമന്ററി രംഗത്തു നിന്നും വിരമിച്ചു. കഴിഞ്ഞ 20 വർഷം കമന്ററി രംഗത്ത് സജീവ സാന്നിദ്ധ്യമായിരുന്നു. ലോകക്രിക്കറ്റിലെ പേടിസ്വപ്നമായിരുന്ന കരീബി യൻ പേസ് ബൗളർമാരിൽ ഒരാളായിരുന്നു ഹോൾഡിംഗ്.
പ്രമുഖ കായിക മാദ്ധ്യമത്തിന് വേണ്ടി 66 കാരനായ ഹോൾഡിംഗ് ഭൂരിപക്ഷം അന്താരാഷ്ട്ര മത്സര വേദികളിലും നിറസാന്നിദ്ധ്യമായിരുന്നു. ഇന്ത്യയും ഇംഗ്ലണ്ടും തമ്മിൽ ഈ മാസം ഇടയ്ക്ക് വെച്ച് ഉപേക്ഷിച്ച പരമ്പരയിലും ഹോൾഡിംഗ് കായിക വിശേഷങ്ങൾ ക്രിക്കറ്റ് പ്രേമികളിലേക്ക് എത്തിച്ചിരുന്നു. വംശീയ വിദ്വേഷങ്ങൾക്കെതിരെ ശക്തമായി പോരാടി യിരുന്ന ഹോൾഡിംഗിന്റെ നിരീക്ഷണങ്ങളും മറുപടികളും ഏറെ ശ്രദ്ധനേടിയിരുന്നു.
ഇനി വേണ്ടത്ര മികവോടെ ഈ രംഗത്ത് തുടരാനാകുമോ എന്നതിൽ വലിയ ഉറപ്പില്ല. നിലവിൽ 66 വയസ്സായി. 46 വയസ്സുകാരനല്ല എന്ന തികഞ്ഞ ബോധ്യമുണ്ടെന്നും കമന്റേറ്റർമാർ കളിയുടെ എല്ലാ ആവേശവും കാണികളിലേക്ക് എത്തിക്കേണ്ടവരാണെന്നും ഹോൾഡിംഗ് പറഞ്ഞു. വെസ്റ്റിൻഡീസിനായി 60 ടെസ്റ്റുകളിലും 102 ഏകദിനങ്ങളിലുമായി 391 വിക്കറ്റുകൾ വീഴ്ത്തിയ മികച്ച ബൗളറായിരുന്നു.
