ജീവിതത്തിൽ സന്തോഷം ആഗ്രഹിക്കാത്തവരായി ആരും തന്നെ ഉണ്ടാകില്ല. സന്തോഷത്തിന്റെ തോത് അളക്കാനുള്ള ഉപകരണം കൂടി ആയോലോ ? ഇരട്ടി സന്തോഷം. കൊച്ചി സ്വദേശിനിയായ ഡോ. ശാലിനി മേനോനാണ് സന്തോഷത്തിന്റെ തോത് അളക്കാനുള്ള ഉപകരണം കണ്ടുപിടിച്ചിരിക്കുന്നത്.
സന്തോഷത്തിന്റെ തോത് അളക്കാൻ ഒരവസരമുണ്ടായാൽ ആരെങ്കിലും വേണ്ടെന്നു വക്കുമോ? ഇല്ല എന്നുതന്നെയാണ് ഉത്തരം. ഗവേഷണങ്ങളിലൂടെയുള്ള കണ്ടെത്തലുകൾ പുസ്തങ്ങളിൽ ഒതുക്കാനുള്ളതല്ലെന്നാണ് ഡോ. ശാലിനിയുടെ നിലപാട്. ഇങ്ങനെയുള്ള ചിന്തയിൽ നിന്നാണ് പ്രബന്ധങ്ങളുടെ അടിസ്ഥാനത്തിൽ ജനങ്ങൾക്ക് ഉപകാരപ്പെടുന്ന തരത്തിലുള്ള ഉപകരണം പുറത്തിറക്കാനുള്ള തീരുമാനത്തിലെത്തിയതെന്ന് യുവ ഗവേഷക പറയുന്നു.
നാഡീതന്തു ഉൽപാദിപ്പിക്കുന്ന രാസപദാർഥമായ ഡോപ്പമൈൻ ആണ് സന്തോഷമുൾപ്പെടെയുള്ള മനുഷ്യവികാരങ്ങൾ നിർണ്ണയിക്കുന്നത്. ഡോപ്പമൈന്റെ അളവ് ശരീരത്തിൽ വർദ്ധിച്ചാൽ പാർക്കിൻസൺസ്, അൽഷിമേഴ്സ്, സ്കീസോഫ്രീനിയ, വിഷാദം തുടങ്ങിയ ഗുരുതരമായ ന്യൂറോളജിക്കൽ രോഗാവസ്ഥകളിലേക്ക് മനുഷ്യനെ നയിച്ചേക്കാം. അതുകൊണ്ടു തന്നെ ഡോപ്പമൈന്റെ അളവ് നിർണ്ണയിക്കാൻ കഴിയുന്ന ഉപകരണമുണ്ടെങ്കിൽ ന്യൂറോളജിചികിത്സാ രംഗത്ത് കൂടുതൽ മുന്നേറ്റമുണ്ടാക്കാൻ കഴിയുമെന്ന നിഗമനമാണ് ‘ഡോപ്പോമീറ്ററിന്റെ കണ്ടുപിടുത്തത്തിലേയ്ക്ക് നയിച്ചത്.
വളരെ കുറഞ്ഞ വിലയ്ക്ക് വിപണിയിൽ ലഭ്യമാക്കാൻ കഴിയുമെന്നതിനാലും സാങ്കേതിക പരിജ്ഞാനം ആവശ്യമില്ലാത്തതിനാലും സാധാരണക്കാർക്ക് സ്വന്തമായി ഉപയോഗിക്കാം എന്നതാണ് എടുത്തുപറയേണ്ട സവിശേഷത. വലിയ ഉപകരണങ്ങളുടെ സഹായത്തോടെ ലാബുകളിൽ മാത്രമാണ് നിലവിൽ ഡോപ്പോമീന്റെ അളവ് പരിശോധിക്കുന്നത്.
ഡോപ്പോമീറ്റർ കയ്യിലുണ്ടെങ്കിൽ വീട്ടിൽ വെച്ചുതന്നെ രോഗനിർണ്ണയം നടത്താം. പരിശോധനയ്ക്കായി സാമ്പിളിന്റെ കുറഞ്ഞ അംശം മാത്രം മതി. നാഡീ സംബന്ധമായ മറ്റ് അസുഖങ്ങൾ കണ്ടെത്തുന്നതിനും ഉപയോഗപ്പെടുത്താമെന്ന് ഡോ. ശാലിനി പറഞ്ഞു. ഇതിനായി ഒരേ ഉപകരണം തന്നെ ഇലക്ട്രോഡ് മാറ്റി ഉപയോഗിച്ചാൽ മതി.
കുസാറ്റ് സയൻസ് ഫാക്കൽറ്റി ഡോ.കെ.ഗിരീഷ് കുമാറിന്റെ മാർഗനിർദ്ദേശത്തിലാണ് ഡോ. ശാലിനി ഉപകരണത്തിന്റെ പ്രോട്ടോടൈപ്പ് വികസിപ്പിച്ചെടുത്തത്. കോഴിക്കോടുള്ള പ്രോ ചിപ്പ് ടെക്നോളജി എന്ന സ്റ്റാർട്ട് അപ്പ് സ്ഥാപനമാണ് സാങ്കേതിക സഹായങ്ങൾ നൽകിയത്. ഉപകരണത്തിന്റെ പേറ്റന്റ് ലഭിച്ചാലുടൻതന്നെ ക്ലിനിക്കൽ പരിശോധനകൾ ആരംഭിക്കാനാണ് തീരുമാനം.
യഥാർത്ഥ സാമ്പിളുകൾ എടുത്ത് നടത്തുന്ന ക്ലിനിക്കൽ ടെസ്റ്റുകൾ വിജയം കണ്ടാൽ ഡോപ്പോമീറ്റർ വിപണിയിലെത്തും. ആധുനിക വൈദ്യ ശാസ്ത്രത്തിനുതന്നെ വലിയൊരു നേട്ടമാകും കുസാറ്റ് അപ്ലൈഡ് കെമിസ്ട്രി വകുപ്പ് സെൻസർ റിസർച്ച് ഗ്രൂപ്പിലെ റിസർച്ച് അസോസിയേറ്റായ ഡോ. ശാലിനി മേനോൻ വികസിപ്പിച്ചെടുത്ത ഡോപ്പോ മീറ്റർ.
Comments