ലണ്ടൻ: കാണ്ടാമൃഗങ്ങളുടെ സംരക്ഷണത്തിനായുള്ള പ്രവർത്തനങ്ങളിൽ പ്രധാനമന്ത്രി നരേന്ദ്ര മോദിയെ അഭിനന്ദിച്ച് ഇംഗ്ലണ്ട് മുൻ ക്രിക്കറ്റ് താരം കെവിൻ പീറ്റേഴ്സൺ. ലോക നേതാക്കൾ പ്രധാനമന്ത്രിയുടെ പാത പിന്തുടരണമെന്ന് അദ്ദേഹം പറഞ്ഞു. ട്വിറ്ററിലൂടെയായിരുന്നു അദ്ദേഹത്തിന്റെ പ്രതികരണം.
ആളുകൾക്കിടയിൽ നിലനിൽക്കുന്ന മിത്തുകളെയും ദുരാചാരങ്ങളെയും ഇല്ലാതാക്കുന്നതിന്റെ ഭാഗമായി കാണ്ടാമൃഗ കൊമ്പുകൾ കത്തിച്ചിരുന്നു. ഇതിന് പിന്നാലെ അസമിന്റെ പ്രവൃത്തിയെ അഭിനന്ദിച്ചും, കാണ്ടാമൃഗത്തിന്റെ സംരക്ഷണത്തിനായി ആവശ്യമായതെല്ലാം ചെയ്യുമെന്നും പ്രധാനമന്ത്രി ട്വീറ്റ് ചെയ്തിരുന്നു. ഇത് ഉദ്ധരിച്ചായിരുന്നു കെവിൻ പീറ്റേഴ്സൺ അഭിനന്ദനം അറിയിച്ചത്.
കാണ്ടാമൃഗങ്ങളുടെ സംരക്ഷണത്തിനായി നിലകൊള്ളുന്ന പ്രധാനമന്ത്രി നരേന്ദ്ര മോദിയ്ക്ക് നന്ദി. കൂടുതൽ ലോകനേതാക്കൾ അദ്ദേഹത്തിന്റെ പാത പിന്തുടരണം. സംരക്ഷിക്കുന്നതുകൊണ്ടാണ് ഇന്ത്യയിൽ കാണ്ടാമൃഗങ്ങളുടെ എണ്ണം വർദ്ധിക്കുന്നത്- കെവിൻ പീറ്റേഴ്സൺ ട്വിറ്ററിൽ കുറിച്ചു.
പ്രധാനമന്ത്രിയുടെ ട്വീറ്റ് റീ ട്വീറ്റ് ചെയ്തുകൊണ്ടായിരുന്നു കെവിൻ പീറ്റേഴ്സിന്റെ പ്രതികരണം. ദുരാചാരങ്ങൾ ഇല്ലാതാക്കാനായുള്ള അസമിന്റെ പ്രവർത്തനങ്ങൾ പ്രത്യേകം പരാമർശിക്കേണ്ടതാണെന്നായിരുന്നു പ്രധാനമന്ത്രിയുടെ പരാമർശം. കാണ്ടാമൃഗങ്ങൾ രാജ്യത്തിന്റെ അഭിമാനമാണ്. ഇവയുടെ സംരക്ഷണത്തിന് വേണ്ടതെല്ലാം കേന്ദ്രസർക്കാർ ചെയ്യുമെന്നും അദ്ദേഹം പറഞ്ഞിരുന്നു.
