കൊച്ചി: മോൻസൻ മാവുങ്കലിന്റെ വീട്ടിൽ നിന്നും അപൂർവ്വയിനം ശംഖുകൾ പിടിച്ചെടുത്ത് വനംവകുപ്പ്. 15 ശംഖുകളാണ് പിടിച്ചെടുത്തത്. പ്രാഥമിക പരിശോധനയിൽ സംരക്ഷിത പട്ടികയിൽ ഉൾപ്പെടുത്തിയവയാണ് ഇതെന്നാണ് വനംവകുപ്പ് പറയുന്നത്. വന്യജീവി സംരക്ഷണ നിയമത്തിലെ 1,2,3 പട്ടികയിൽപ്പെടുന്നവയാണ് ഇവ.
ശംഖുകളുടെ ഫോറൻസിക് പരിശോധനയ്ക്ക് ശേഷം മോൻസനെതിരെ കേസെടുക്കുമെന്ന് വനംവകുപ്പ് അറിയിച്ചു. നേരത്തെ മോൻസന്റെ മ്യൂസിയത്തിലുള്ള ആനക്കൊമ്പ് വ്യാജമാണെന്ന് കണ്ടെത്തിയിരുന്നു. ഒട്ടകത്തിന്റെ എല്ല് കൊണ്ട് നിർമ്മിച്ചവയാണ് ആനക്കൊമ്പെന്നാണ് വനംവകുപ്പ് അറിയിച്ചത്.
മോൻസന്റെ മ്യൂസിയത്തിന്റെ ദൃശ്യങ്ങളിൽ ആനക്കൊമ്പിന്റെ ചിത്രങ്ങൾ കണ്ടതിന് പിന്നാലെയാണ് വനംവകുപ്പും പരിശോധനയ്ക്ക് ഒരുങ്ങിയത്. വീടുകളിൽ ഉണ്ടായിരുന്ന ശിൽപങ്ങളൊന്നും ചന്ദനത്തിൽ തീർത്തതല്ലെന്നും വനംവകുപ്പ് കണ്ടെത്തിയിട്ടുണ്ട്.
സാമ്പത്തിക തട്ടിപ്പ് നടത്തിയതിന് അറസ്റ്റിലായ മോൻസൻ മാവുങ്കൽ ക്രെെംബ്രാഞ്ചിന്റെ പിടിയിലായതോടെയാണ് ഇയാൾക്കെതിരായ കൂടുതൽ വിവരങ്ങൾ പുറത്തുവരുന്നത്. സെപ്തംബർ 26നാണ് മോൻസനെ ക്രൈംബ്രാഞ്ച് അറസ്റ്റ് ചെയ്യുന്നത്.
