ന്യൂഡൽഹി: ലഹരി പാർട്ടിയിൽ നിന്നും എൻസിബി കസ്റ്റഡിയിലെടുത്ത ബോളിവുഡ് സൂപ്പർതാരം ഷാരൂഖ് ഖാന്റെ മകൻ ആര്യൻ ഖാന് പിന്തുണയുമായി നടൻ സുനിൽ ഷെട്ടി. ബോളിവുഡിൽ എന്ത് സംഭവിച്ചാലും മാദ്ധ്യമങ്ങൾ പെട്ടെന്ന് തീർപ്പ് കൽപ്പിക്കുകയാണെന്നും യഥാർത്ഥ വിവരങ്ങൾ പുറത്തുവരുന്നത് വരെ കാത്തിരിക്കണമെന്നും സുനിൽ ഷെട്ടി ആവശ്യപ്പെട്ടു.
ഒരു റെയ്ഡ് എവിടെ നടന്നാലും അതിനെ തുടർന്ന് ആളുകൾ പിടിക്കപ്പെടും. ഇവിടെ അത്തരത്തിൽ ഒരു പരിശോധന നടന്നതിന് പിന്നാലെ ഈ കുട്ടി (ആര്യൻ ഖാൻ) കസ്റ്റഡിയിലായി. ഇതോടെ അവൻ ലഹരി ഉപയോഗിച്ചിട്ടുണ്ടെന്നും കേസിൽ പങ്കാളിയാണെന്നും നാം വിധിയെഴുതി. കേസ് നടപടികൾ പുരോഗമിക്കുകയാണെന്നും ശ്വാസം വിടാനുള്ള അവസരമെങ്കിലും ആ കുട്ടിക്ക് കൊടുക്കണമെന്നും സുനിൽ ഷെട്ടി മാദ്ധ്യമങ്ങളോട് പ്രതികരിച്ചു.
#WATCH | When a raid is conducted at a place, many people are taken into custody. We assume that a particular boy must have consumed it (drugs). The process is on. Let's give that child a breather. Let real reports come out: Actor Sunil Shetty on NCB raid at an alleged rave party pic.twitter.com/qYaYSsxkyi
— ANI (@ANI) October 3, 2021
‘ ബോളിവുഡിൽ എപ്പോഴെങ്കിലും എന്തെങ്കിലും സംഭവിച്ചാൽ ഓരോന്നും പ്രത്യേക സൂക്ഷ്മ പരിശോധന നടത്തി പൊടുന്നനെ വിഷയത്തിൽ നിഗമനത്തിലെത്തുകയാണ് മാദ്ധ്യമങ്ങൾ ചെയ്യുന്നത്. ആ കുട്ടിക്ക് ഒരു അവസരം കൊടുക്കൂ.. സത്യം പുറത്തുവരട്ടെ.. അവനൊരു കുഞ്ഞല്ലേ.. അവനെ നോക്കേണ്ടത് ഞങ്ങളുടെ ഉത്തരവാദിത്വമാണ്.. ‘ സുനിൽ ഷെട്ടി പറഞ്ഞു.
ശനിയാഴ്ച രാത്രിയാണ് മുംബൈയിലെ ആഡംബര കപ്പലിൽ നടന്ന ലഹരിപാർട്ടിയിൽ എൻസിബിയുടെ റെയ്ഡ് നടന്നത്. സംഭവത്തിൽ ആര്യൻ ഖാനും ബോളിവുഡ് നടൻ അർബാസ് സേത്ത് മെർച്ചന്റും ഉൾപ്പെടെ എട്ട് പേർ കസ്റ്റഡിയിലായി. സംഗീത പാർട്ടിയുടെ മറവിൽ ലഹരി പാർട്ടി നടത്തുകയായിരുന്നുവെന്നാണ് വിവരം. സംഭവത്തിൽ കോടിക്കണക്കിന് രൂപയുടെ മയക്കുമരുന്നാണ് അന്വേഷണ സംഘം പിടിച്ചെടുത്തത്.
