12 വർഷങ്ങൾക്ക് ശേഷം ഷാജി കൈലാസും മോഹൻലാലും ഒന്നിക്കുന്ന സിനിമയുടെ ടൈറ്റിൽ പ്രഖ്യാപിച്ചു. എലോൺ(alone) എന്നാണ് ചിത്രത്തിന്റെ പേര്. ‘ഷാജിയുടെ നായകന്മാർ എപ്പോഴും ശക്തരാണ്, ധീരരാണ്. യഥാർത്ഥ നായകൻ എല്ലായ്‌പ്പോഴും തനിച്ചാണ്. അത് ഈ ചിത്രം കാണുമ്പോൾ നിങ്ങൾക്ക് മനസിലാകും’മോഹൻലാൽ വ്യക്തമാക്കി.
മോഹൻലാൽ ഉൾപ്പെടെയുള്ളവർ ഒരുമിച്ചെത്തിയാണ് സിനിമയുടെ പേര് വെളിപ്പെടുത്തിയത്. ഹിറ്റ് ചിത്രങ്ങൾ മലയാളികൾക്ക് സമ്മാനിച്ച കൂട്ടുകെട്ടാണ് മോഹൻലാലും ഷാജി കൈലാസും. ഒക്ടോബറിൽ സിനിമയുടെ ചിത്രീകരണം ആരംഭിക്കുമെന്ന് മോഹൻലാൽ സോഷ്യൽ മീഡിയയിലൂടെ അറിയിച്ചിരുന്നു. രാജേഷ് ജയറാം ആണ് ചിത്രത്തിന് തിരക്കഥ എഴുതുന്നത്.
ആശീർവാദ് ഫിലിംസിന്റെ ബാനറിൽ ആന്റണി പെരുമ്പാവൂരാണ് ഈ ചിത്രം നിർമ്മിക്കുന്നത്. ആശിർവാദ് സിനിമാസിന്റെ 30-ാമത്തെ ചിത്രമാണിത്. 2000ത്തിൽ ഷാജികൈലാസ്-മോഹൻലാൽ കൂട്ടുകെട്ടിൽ പുറത്തിറങ്ങിയ നരസിംഹമായിരുന്നു ആശിർവാദ് സിനിമാസിന്റെ ലോഞ്ചിംഗ് ചിത്രം. 2009ൽ റിലീസ് ചെയ്ത റെഡ് ചില്ലീസ് ആണ് ഷാജി കൈലാസ് മോഹൻലാൽ കൂട്ടുകെട്ടിൽ പിറന്ന അവസാന ചിത്രം. നരസിംഹം, ആറാം തമ്പുരാൻ തുടങ്ങി മോഹൻലാൽ ഷാജി കൈലാസ് കൂട്ടുകെട്ടിൽ പിറന്ന ചിത്രങ്ങളെല്ലാം ബോക്‌സ് ഓഫീസ് ഹിറ്റായിരുന്നു.
