ഹൈദരാബാദ്: ലോകത്തിലെ ആദ്യ അംഗീകൃത മലേറിയ വാക്സിൻ ഉത്പാദിപ്പിക്കാനൊരുങ്ങി ഇന്ത്യയുടെ ഭാരത് ബയോടെക്. പ്രമുഖ ഫാർമ കമ്പനിയായ ജി.എസ്.കെയാണ് ആർടിഎസ്, എസ്/എഎസ്01ഇ1 എന്ന ആദ്യ മലേറിയ പ്രതിരോധ വാക്സിൻ നിർമ്മിച്ചത്. കഴിഞ്ഞ ദിവസമാണ് ലോകാരോഗ്യ സംഘടനയുടെ അംഗീകാരം വാക്സിന് ലഭിച്ചത്.
വിപണിയിൽ ജി.എസ്.കെ നിർമ്മിത വാക്സിൻ എത്തി കുറച്ച് വർഷങ്ങൾക്കുള്ളിൽ തന്നെ ഇന്ത്യയിൽ ഉത്പാദിപ്പിച്ച വാക്സിൻ ലഭ്യമാകുമെന്നാണ് അധികൃതർ പറയുന്നത്. ഈ വർഷം ജനുവരിയിൽ തന്നെ മലേറിയ വാക്സിൻ ഇന്ത്യയിൽ ഉത്പാദിപ്പിക്കുന്നത് സംബന്ധിച്ച കരാർ ഭാരത് ബയോടെകും ജി.എസ്.കെയും ഒപ്പുവെച്ചിരുന്നു.
കരാറിന്റെ ഭാഗമായി വാക്സിൻ ഉത്പാദിപ്പിക്കുന്നതിന് ആവശ്യമായ ആന്റിജനുകളും, സങ്കേതിക സഹായമുൾപ്പെടെ ജി.എസ്.കെ വാഗ്ദാനം ചെയ്തിരുന്നു. കൂടാതെ വാക്സിൻ ഉത്പാദിപ്പിക്കാനായുള്ള ലൈസൻസും ഭാരത് ബയോടെകിന് ലഭിക്കും. ഇതോടൊപ്പം ജി.എസ്.കെ നിർമ്മിച്ച വാക്സിൻ സാമ്പിളുകളും ബയോടെകിന് നൽകുമെന്ന് ജി.എസ്.കെ അറിയിച്ചു.
കഴിഞ്ഞ 30 വർഷമായി ജി.എസ്.കെ മലേറിയ വാക്സിൻ വികസിപ്പിക്കുന്ന പരീക്ഷണത്തിലായിരുന്നു. ഇതിന്റെ ഭാഗമായി ഘാന, കെനിയ, മലാവി എന്നിവിടങ്ങളിലെ 80,000ത്തിൽ അധികം കുട്ടികളിൽ വാക്സിൻ കുത്തിവെച്ചിരുന്നു. മികച്ച ഫലപ്രാപ്തി കൈവരിച്ചതോടെയാണ് വാക്സിന് ലോകാരോഗ്യ സംഘടനയുടെ അംഗീകാരം ലഭിച്ചത്.
പ്രതിവർഷം നാല് ലക്ഷം പേരാണ് ആഫ്രിക്കയിൽ മലേറിയ ബാധിച്ച് മരണത്തിന് കീഴടങ്ങുന്നത്. ഇതിൽ ഭൂരിഭാഗവും കുട്ടികളാണ്. 2019ൽ മാത്രം രണ്ടര ലക്ഷം കുട്ടികൾ ആഫ്രിക്കയിൽ രോഗം ബാധിച്ച് മരിച്ചിട്ടുണ്ട്.
Comments