ദുബായ്: അത്യന്തം ഉദ്വേഗം നിറഞ്ഞ മത്സരത്തിൽ അവസാന പന്തിൽ സിക്സർ പറത്തി ശ്രീകർ ഭരത് ബംഗളൂരു റോയൽ ചലഞ്ചേഴ്സിനെ വിജയത്തിലേക്ക് നയിച്ചു. ഐപിഎല്ലിൽ കരുത്തന്മാർ തമ്മിലുളള പോരാട്ടത്തിൽ ഡൽഹി ക്യാപിറ്റൽസിനെ ഏഴ് വിക്കറ്റിന് പരാജയപ്പെടുത്തിയാണ് ബംഗളൂരു അവസാന മത്സരം ആഘോഷമാക്കിയത്.
അവസാന പന്തിൽ ആറ് റൺസ് എടുത്താൽ മാത്രമേ ബംഗളൂരുവിന് ജയിക്കാൻ കഴിയുമായിരുന്നുളളൂ. അവേഷ് ഖാൻ എറിഞ്ഞ പന്ത് ഗ്യാലറിയിലേക്ക് അടിച്ച് ബംഗളൂരുവിന് വിജയം സമ്മാനിക്കുകയായിരുന്നു. ശ്രീകർ പുറത്താവാതെ 78 റൺസ് എടുത്തു. ശ്രീകറിന് കൂട്ടായി 51 റൺസുമായി ഗ്ലൻ മാക്സ്വെൽ അപരാജിതനായി ഉണ്ടായിരുന്നു. ആദ്യം ബാറ്റ് ചെയ്ത ഡൽഹി 4 വിക്കറ്റ് നഷ്ടത്തിൽ 165 റൺസാണ് എടുത്തത്. പരാജയപ്പെട്ടെങ്കിലും ഡൽഹി തന്നെയാണ് ഒന്നാമതായി പ്ലേഓഫിൽ കടന്നത്. ബംഗളൂരുവും പ്ലേഓഫിൽ നേരത്തെ കടന്നിരുന്നു
