ഭുവനേശ്വർ: നവരാത്രി ഉത്സവാഘോഷങ്ങളിൽ പൂജിക്കുന്ന ദുർഗ്ഗാ ദേവിയുടെ മനോഹരമായ പ്രതിമയുമായി പുരിയിൽ നിന്നുള്ള കലാകാരൻ. ഈ രൂപത്തിന് ഒരു പ്രത്യേകത ഉണ്ട്, ഐസ്ക്രീം സ്റ്റിക് ഉപയോഗിച്ചാണ് പ്രതിമയുടെ നിർമ്മാണം.
ബിശ്വജീത് നായക് എന്ന കലാകാരനാണ് ഈ മനോഹര സൃഷ്ടിക്ക് പിന്നിൽ. 275 ഐസ്ക്രീം സ്റ്റിക്കുകൾ ഉപയോഗിച്ചാണ് ദേവിയുടെ പ്രതിമ നിർമ്മിച്ചിരിക്കുന്നത്. ആറ് ദിവസം കൊണ്ട് നിർമ്മാണം പൂർത്തീകരിച്ചു എന്നാണ് ബിശ്വജിത് പറയുന്നത്.
കൊറോണ മഹാമാരിയുടെ പശ്ചാത്തലത്തിൽ നവരാത്രി ആഘോഷങ്ങൾക്ക് ഭുവനേശ്വർ മുനിസിപ്പൽ കോർപ്പറേഷൻ നിയന്ത്രണം ഏർപ്പെടുത്തിയിട്ടുണ്ട്. കോർപ്പറേഷന്റെ നിർദ്ദേശമനുസരിച്ച് ദുർഗ്ഗാ ദേവിയുടെ പ്രതിമകൾ നാല് അടിയിൽ കൂടരുത്. മാത്രമല്ല പൂജ വേദിയിൽ ഒരേ സമയം ഏഴ് പേർക്ക് മാത്രമേ പ്രവേശനാനുമതിയുള്ളു.
ഇതുകൂടാതെ നവരാത്രി ആഘോഷങ്ങൾക്ക് ശേഷം ദേവിയുടെ വിഗ്രഹം പൊതു ജല സ്രോതസുകളിൽ നിമജ്ജനം ചെയ്യാൻ അനുവാദമില്ല. ഇതിനായി പ്രത്യേകം തയ്യാറാക്കിയ കുളങ്ങളിൽ മാത്രമായിരിക്കും അനുമതി എന്നും മുൻസിപ്പൽ കോർപ്പറേഷൻ അറിയിച്ചു.
Comments