അമൃത്സര്: രാജ്യാന്തര അതിര്ത്തി കടന്നു പോകുന്ന സംസ്ഥാനങ്ങളില് ബിഎസ്എഫിന്റെ അധികാരപരിധി കൂട്ടി നിശ്ചയിച്ച് നല്കിയ കേന്ദ്രതീരുമാനത്തെ വിമര്ശിച്ച് പഞ്ചാബ് മുഖ്യമന്ത്രി ചരണ്ജിത്ത് സിംഹ് ഛന്നി. പുതിയ തീരുമാനപ്രകാരം പഞ്ചാബ്, പശ്ചിമ ബംഗാള്, ആസാം എന്നീ സംസ്ഥാനങ്ങളില് അന്താരാഷ്ട്ര അതിര്ത്തിയില് നിന്നുള്ള 50 കിലോമീറ്റര് ദൂരം ബിഎസ്എഫിന്റെ നിയന്ത്രണത്തില് വരും. നേരത്തെ 15 കിലോമീറ്റര് ദൂരം മാത്രമായിരുന്നു ബിഎസ്എഫിന്റെ പരിധിയില് ഉണ്ടായിരുന്നത്. ഇനി ഈ പ്രദേശങ്ങളില് പരിശോധനയോ അറസ്റ്റോ നടത്തുന്നതിന് ബിഎസ്എഫിന് സംസ്ഥാനങ്ങളുടെ അനുവാദത്തിന്റെ ആവശ്യമുണ്ടാകില്ല. തീവ്രവാദത്തേയും അവരുടെ രാജ്യവിരുദ്ധ നീക്കങ്ങളേയും ശക്തമായി എതിര്ക്കുന്നതിന്റെ ഭാഗമായിട്ടാണ് നീക്കം.
എന്നാല് കേന്ദ്രത്തിന്റെ തീരുമാനം സംസ്ഥാനങ്ങളുടെ ഭരണത്തിലേക്ക് നേരിട്ടുള്ള കടന്നുകയറ്റമാണെന്ന് ഛന്നി ആരോപിച്ചു. ‘ ബിഎസ്എഫിന് അതിര്ത്തിയില് നിന്നും 50 കിലോമീറ്റര് അധികദൂരത്തേക്ക് അധികാരം നല്കുന്ന കേന്ദ്ര തീരുമാനത്തെ ശക്തമായി എതിര്ക്കുന്നു. ഇത് സംസ്ഥാനത്തിന്റെ ഭരണത്തിന് മേലെ നേരിട്ടുള്ള കടന്നുകയറ്റമാണ്. ഈ തീരുമാനം എത്രയും വേഗം പിന്വലിക്കണമെന്ന് കേന്ദ്ര ആഭ്യന്തരമന്ത്രി അമിത് ഷായോട് ആവശ്യപ്പെടുകയാണെന്നും’ ഛന്നി ട്വിറ്ററില് കുറിച്ചു.
അതേസമയം തീരുമാനത്തെ സ്വാഗതം ചെയ്ത് മുന് പഞ്ചാബ് മുഖ്യമന്ത്രി അമരീന്ദര് സിംഗ് രംഗത്തെത്തിയിരുന്നു. രാഷ്ട്രീയ താത്പര്യങ്ങള് രാജ്യതാത്പര്യത്തെക്കാള് മുകളില് വരരുതെന്നും അമരീന്ദര് പറഞ്ഞിരുന്നു. ബിഎസ്എഫിന്റെ സാന്നിദ്ധ്യം കൂടുതല് പ്രദേശങ്ങളിലേക്ക് വര്ദ്ധിപ്പിക്കുന്നത് രാജ്യത്തെ കൂടുതല് ശക്തമാക്കുമെന്ന് അദ്ദേഹം പറഞ്ഞു. ഈ വിഷയത്തെ രാഷ്ട്രീയത്തിലേക്ക് വലച്ചിഴക്കരുത്. 2016ല് സര്ജ്ജിക്കല് സ്ട്രൈക്കിന്റെ സമയത്തും ഇതേ ആവശ്യം താന് മുന്നോട്ട് വച്ചിട്ടുണ്ടെന്നും അമരീന്ദര് പറഞ്ഞു
