ധാക്ക: ബംഗ്ലാദേശില് ദുര്ഗാ പൂജാ പന്തലുകള്ക്കും ക്ഷേത്രങ്ങള്ക്കും വിഗ്രഹങ്ങള്ക്കും നേരെ ഇസ്ലാമിക തീവ്രവാദികളുടെ ആക്രമണങ്ങള് വ്യാപകമാകുന്നു. ദുര്ഗാ ദേവിയുടെ വിഗ്രഹങ്ങള് നശിപ്പിച്ചതായി നിരവധി പരാതികളാണ് കഴിഞ്ഞ 24 മണിക്കൂറിനിടെ രാജ്യത്ത് റിപ്പോര്ട്ട് ചെയ്തത്. കൊമില്ലയിലെ നനുവ ദിഗിയില് ദുര്ഗാ പൂജാ പന്തല് അക്രമി സംഘം നശിപ്പിച്ചു. ഇവിടെ സൂക്ഷിച്ചിരുന്ന വിഗ്രഹവും എടുത്ത് പുറത്തെറിഞ്ഞു. പോലീസെത്തി അക്രമി സംഘത്തെ നിയന്ത്രിക്കാന് ശ്രമിച്ചെങ്കിലും സാധിച്ചില്ല.
ബംഗ്ലാദേശിന്റെ ചരിത്രത്തിലെ ഞെട്ടിപ്പിക്കുന്ന ദിവസങ്ങളില് ഒന്നായിരുന്നു ഇതെന്ന് ബംഗ്ലാദേശ് ഹിന്ദു യൂണിറ്റി കൗണ്സില് ട്വീറ്റ് ചെയ്തു. ബംഗ്ലാദേശിലെ ഹിന്ദുക്കളുടെ കറുത്ത ദിവസം എന്ന് പറഞ്ഞുകൊണ്ടായിരുന്നു ഈ ട്വീറ്റ്. ‘ കഴിഞ്ഞ 24 മണിക്കൂറില് ഇവിടെ എന്തൊക്കെയാണ് സംഭവിച്ചതെന്ന് ഒരു ട്വീറ്റില് ഒതുക്കാന് കഴിയില്ല. ബംഗ്ലാദേശിലെ ഹിന്ദുക്കള് ചില ആളുകളുടെ യഥാര്ത്ഥ മുഖം മനസിലാക്കിയിരിക്കുകയാണ്. ഭാവിയില് ഇനി എന്ത് സംഭവിക്കുമെന്ന് പറയാനാകില്ല. പക്ഷേ ഒരു കാര്യം പറയാം ഈ വര്ഷത്തെ ദുര്ഗാ പൂജാ ദിവസം ഹിന്ദുക്കള് ഒരിക്കലും മറക്കില്ല. ദേവി എല്ലാവരേയും അനുഗ്രഹിക്കട്ടേയെന്നും ‘ ട്വീറ്റില് പറയുന്നു.
കഴിഞ്ഞ ഏതാനും ദിവസങ്ങളായി ബംഗ്ലാദേശില് ദുര്ഗാ പൂജാ പന്തലുകള്ക്ക് നേരെ ഇസ്ലാമിക തീവ്രവാദികള് അക്രമം അഴിച്ചു വിടുന്നുണ്ട്. ചിറ്റഗോംഗിലെ കൊട്വാലി, കുസ്തിയ, ജോയ്പൂര്ഹത്ത് എന്നിവിടങ്ങളില് അക്രമം നടന്നതായി റിപ്പോര്ട്ടുകളുണ്ട്. ഹിന്ദു കുടുംബങ്ങള്ക്ക് നേരെയും തീവ്രവാദികള് അക്രമം അഴിച്ചു വിടുന്നുണ്ട്. അക്രമത്തില് പരിക്കേറ്റ നിരവധി പേര് ആശുപത്രിയില് ചികിത്സയിലാണ്.
