ന്യൂഡൽഹി : രാജ്യത്തെ വാക്സിനേഷൻ നൂറ് കോടിയിലേക്ക് കടക്കുന്ന പശ്ചാത്തലത്തിൽ വാക്സിനേഷൻ ഗീതം പുറത്തിറക്കി കേന്ദ്ര ആരോഗ്യമന്ത്രി മാൻസുഖ് മാണ്ഡവ്യ. പ്രശസ്ത സംഗീത സംവിധായകൻ പത്മശ്രീ കൈലാഷ് ഖേർ പാടിയ ഭാരത് കാ ടികാകരൺ എന്ന ഗാനമാണ് കേന്ദ്ര സർക്കാർ പുറത്തിറക്കിയത്. 3.30 മിനിറ്റ് ഗാനം ട്വിറ്ററിലൂടെയാണ് ആരോഗ്യമന്ത്രി പങ്കുവെച്ചത്.
കൊറോണ മഹാമാരിക്കെതിരെ പോരാടാനുള്ള സർക്കാരിന്റെ സമഗ്ര സമീപനത്തിന്റെ ഫലമാണ് വാക്സിനേഷൻ ഗാനം എന്ന് മാൻസുഖ് മാണ്ഡവ്യ പറഞ്ഞു. വാക്സിനേഷൻ ആശങ്ക ഇല്ലാതാക്കുന്നതിനായി പെട്രോളിയം മന്ത്രാലയമാണ് ഗാനം എന്ന ആശയം ഉന്നയിച്ചത്. കൊറോണ വാക്സിന്റെ ഫലപ്രാപ്തിയെക്കുറിച്ച് ഈ ഗാനം ജനങ്ങളിൽ അവബോധം സൃഷ്ടിക്കുമെന്നും അദ്ദേഹം പറഞ്ഞു.
टीके से बचा है देश टीके से
टीके से बचेगा देश टीके से….#BharatKaTikakaran pic.twitter.com/aXfB8n65J7— Dr Mansukh Mandaviya (@mansukhmandviya) October 16, 2021
രാജ്യത്തെ വാക്സിനേഷൻ പ്രോഗ്രാമിനെ പ്രശംസിച്ചുകൊണ്ട് കേന്ദ്ര പെട്രോളിയം മന്ത്രി ഹർദീപ് സിംഗ് പുരിയും രംഗത്തെത്തി. പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ, ആരോഗ്യമന്ത്രി മാൻസുഖ് മാണ്ഡവ്യയുടെ അശ്രാന്ത പ്രവർത്തനത്തിന്റെ ഫലമായി രാജ്യം നൂറ് കോടി വാക്സിനേഷൻ എന്ന റെക്കോർഡിലേക്ക് നീങ്ങുകയാണ്. രാജ്യത്തെ വാക്സിനേഷൻ ക്യാമ്പെയിൻ ഒരു ബഹുജന പ്രസ്ഥാനമായി ഇതിനോടകം മാറിക്കഴിഞ്ഞു. ഈ വിജയത്തിന് കാരണം ഒറ്റക്കെട്ടായുള്ള എല്ലാവരുടേയും പ്രവർത്തനമാണെന്നും അദ്ദേഹം ചൂണ്ടിക്കാട്ടി. ഈ യാത്ര ഇനിയും തുടരുമെന്നും പുരി ട്വിറ്ററിൽ കുറിച്ചു.
Comments