മലയാളികളുടെ പ്രിയപ്പെട്ട ഗായികയാണ് സിത്താര കൃഷ്ണകുമാർ. സെല്ലുലോയിഡ് സിനിമയിലെ ഏനുണ്ടോടി എന്ന പാട്ടിൽ തുടങ്ങി പുതിയ ചായ പാട്ടു വരെ, സിത്താരയുടെ ഓരോ ഗാനവും സംഗീത പ്രേമികൾക്ക് പ്രിയപ്പെട്ടതാണ്. സംഗീത രംഗത്ത് സജീവമാണെങ്കിലും ഇപ്പോൾ സിത്താര മലയാളികളുടെ മനസ് കീഴടക്കിയിരിക്കുന്നത് മറ്റൊരു മേഖലയിലാണ്. ഇതിലൂടെ താനൊരു പാട്ടുകാരി മാത്രമല്ല നർത്തകി കൂടിയാണെന്ന് വീണ്ടും തെളിയിക്കുകയാണ് സിത്താര.
കഴിഞ്ഞ ആഴ്‌ച്ച പുറത്തിറക്കിയ തരുണി എന്ന സംഗീത നൃത്ത ആൽബത്തിലൂടെയാണ് പ്രേക്ഷക മനസിൽ സിത്താര വീണ്ടും ഇടംപിടിക്കുന്നത്. പാട്ടിനൊപ്പം മനോഹരമായി ചുവടുവെയ്‌ക്കുന്ന സിത്താരയെ വീഡിയോയിൽ കാണാനാകും. മൂന്ന് വ്യത്യസ്ത ലുക്കുകളിലാണ് സിത്താര കൃഷ്ണകുമാർ വീഡിയോയിൽ പ്രത്യക്ഷപ്പെടുന്നത്. ദുർഗ്ഗാ ദേവി എന്ന സങ്കൽപ്പത്തെ മുഴുവൻ സ്ത്രീ സമൂഹത്തിന്റെ പ്രതിനിധിയായി ആഖ്യാനിച്ച് കൊണ്ടുള്ളതാണ് പാട്ട്.
‘തരുണി’ ഇതിനോടകം നിരവധി പ്രേക്ഷകരെ സ്വന്തമാക്കിക്കഴിഞ്ഞു. മികച്ച പ്രതികരണങ്ങളാണ് സമൂഹമാദ്ധ്യമങ്ങളിൽ നിന്നും ലഭിക്കുന്നത്. ബി.കെ. ഹരിനാരായണന്റെ വരികൾക്ക് മിഥുൻ ജയരാജ് ആണ് സംഗീതം പകർന്നിരിക്കുന്നത്. ബിജു ധ്വനിതരംഗ് നൃത്തസംവിധാനം നിർവഹിച്ചിരിക്കുന്നു. സുമേഷ് ലാൽ ആണ് ഗാനരംഗങ്ങളുടെ സംവിധായകൻ. മഹേഷ് എസ്.ആർ, അനീഷ് ചന്ദ്രൻ എന്നിവർ ചേർന്ന് ഛായാഗ്രഹണവും ആൽബി നടരാജ് എഡിറ്റിങ്ങും നിർവഹിച്ചിരിക്കുന്നു.
സിതാരയുടെ നൃത്തത്തിലെ മികവിനെ അഭിനന്ദിക്കുകയാണ് ആരാധകർ ഇപ്പോൾ. ഇതുവരെ 727,840ത്തിൽ അധികം പേരാണ് വീഡിയോ കണ്ടിരിക്കുന്നത്. മികച്ച ഗായികയ്‌ക്കുള്ള സംസ്ഥാന സർക്കാരിന്റെ പുരസ്‌കാരം ഒന്നിലേറെ തവണ നേടിയ ഗായികയാണ് സിത്താര കൃഷ്ണകുമാർ. പാട്ടും, സംഗീത സംവിധാനവും, മ്യൂസിക് ആൽബത്തിലെ അഭിനയവും എല്ലാമായി സിത്താര ഒരു സകലകലാവല്ലഭ തന്നെയാണെന്ന് പലകുറി തെളിയിച്ചു കഴിഞ്ഞു.
