ഗണേശ വിഗ്രഹത്തിന്റെ ശിരസിൽ ചവിട്ടി ഫോട്ടോയെടുത്ത് സമൂഹമാദ്ധ്യമങ്ങളിൽ പ്രചരിപ്പിച്ചു; അർബാസ് ഖാനെ അറസ്റ്റ് ചെയ്ത് അസം പോലീസ്

ഗുവാഹട്ടി : ഗണേശ വിഗ്രഹത്തിന്റെ ശിരസിൽ ചവിട്ടി ഫോട്ടോയെടുത്തയാളെ അറസ്റ്റ് ചെയ്ത് അസം പോലീസ്. നാഗാവ് സ്വദേശി അക്ബാസ് ഖാൻ ആണ് അറസ്റ്റിലായത്. അർലോംഗ് കുന്ദിലെ ചരിത്ര പ്രസിദ്ധമായ ഗണേശ ക്ഷേത്രത്തിലെ വിഗ്രഹത്തിന്റെ ശിരസ്സിലാണ് ഇയാൾ ചവിട്ടി നിന്ന് ഫോട്ടോയെടുത്തത്.

സംഭവത്തിൽ ക്ഷേത്രം അധികൃതർ നൽകിയ പരാതിയിലാണ് അർബാസ് ഖാനെതിരെ പോലീസ് കേസ് എടുത്തത്. കഴിഞ്ഞ ദിവസമായിരുന്നു ഗണേശ വിഗ്രഹത്തിൽ ചവിട്ടി അർബാസ് ഖാൻ ഫോട്ടോയെടുത്തത്. ശേഷം ഇയാൾ ഇത് സമൂഹമാദ്ധ്യമങ്ങളിൽ പങ്കുവെയ്‌ക്കുകയും ചെയ്തു. സമൂഹമാദ്ധ്യമങ്ങളിൽ ചിത്രം വ്യാപകമായി പ്രചരിച്ചതോടെ സംഭവം ക്ഷേത്രം അധികൃതരുടെ ശ്രദ്ധയിൽപ്പെട്ടു. തുടർന്ന് പോലീസിൽ പരാതി നൽകുകയായിരുന്നു.

പരാതി നൽകിയതിന് പിന്നാലെ അർബാസ് ഒളിവിൽ പോയി. തുടർന്ന് നിർണായക നീക്കത്തിലൂടെയാണ് ഇയാളെ പോലീസ് പിടികൂടിയത്. ഇയാൾക്കെതിരെ മതവികാരം വ്രണപ്പെടുത്തിയതുൾപ്പെടെയുള്ള കുറ്റങ്ങളാണ് ചുമത്തിയിരിക്കുന്നത്.

ഗണേശ വിഗ്രഹത്തിൽ ചവിട്ടി ഹിന്ദു മത വികാരം വ്രണപ്പെടുത്തിയ അർബാസിനെതിരെ നടപടി സ്വീകരിക്കണമെന്ന് ആവശ്യപ്പെട്ട് ശക്തമായ പ്രതിഷേധമാണ് ഹിന്ദു വിശ്വാസികളുടെ ഭാഗത്തു നിന്നും ഉണ്ടായത്. ബജ്രംഗ് ദൾ ഉൾപ്പെടെയുള്ള ഹിന്ദു സംഘടനകൾ പ്രതിഷേധ പ്രകടനമുൾപ്പെടെ നടത്തിയിരുന്നു.