കൊല്ലം : പാർട്ടി സമ്മേളനത്തിന് പ്രവർത്തകർ ആവശ്യപ്പെട്ട തുക പിരിവ് നൽകാത്തതിനെ തുടർന്ന് സൂപ്പർ മാർക്കറ്റിൽ ബോർഡ്വെച്ച് സിപിഎം. കണ്ണനല്ലൂരിലെ സ്വകാര്യ സൂപ്പർമാർക്കറ്റിന് മുൻപിലാണ് സിപിഎം ബോർഡുകളും ബാനറുകളും സ്ഥാപിച്ചത്. സംഭവം വിവാദമായപ്പോൾ ബോർഡ് നീക്കി സിപിഎം പ്രവർത്തകർ തടിതപ്പി.
ഞായറാഴ്ച വൈകീട്ടോടെയായിരുന്നു സംഭവം. സിപിഎം തഴുത്തല ലോക്കൽ സമ്മേളനം നടക്കാനിരിക്കെയാണ് പിരിവ് ചോദിച്ച് പ്രവർത്തകർ സൂപ്പർമാർക്കറ്റിൽ എത്തിയത്. 2000 രൂപ പിരിവായി വേണമെന്നായിരുന്നു പ്രവർത്തകരുടെ ആവശ്യം. എന്നാൽ അത്രയും നൽകാനാകില്ലെന്നും 500 രൂപ നൽകാമെന്നും സൂപ്പർമാർക്കറ്റ് ഉടമകൾ പറഞ്ഞു. എന്നാൽ ഇത് സ്വീകരിക്കാതെ സൂപ്പർ മാർക്കറ്റിൽ നിന്നും ഇറങ്ങിയ പ്രവർത്തകർ അൽപ്പ നേരം കഴിഞ്ഞെത്തി ബോർഡുകളും ബാനറുകളും സ്ഥാപിച്ച് മാർഗ്ഗ തടസ്സം ഉണ്ടാക്കുകയായിരുന്നു. സംഭവം ചർച്ചയായതോടെ തിങ്കളാഴ്ച രാവിലെ പ്രവർത്തകർ എത്തി ഇത് നീക്കി.
അതേസമയം സംഭവത്തിൽ പാർട്ടിയ്ക്ക് പങ്കില്ലെന്ന് സിപിഎം തഴുത്തല ലോക്കൽ സെക്രട്ടറി എൻ.സി പിള്ള പറഞ്ഞു.
