ലക്നൗ: കേന്ദ്ര ആഭ്യന്തരമന്ത്രി അമിത് ഷാ ഇന്ന് ലക്നൗവിൽ സന്ദർശനം നടത്തും. ബിജെപിയുടെ വിവിധ പരിപാടികളിൽ പങ്കെടുക്കുന്നതിനാണ് സന്ദർശനം.
രാവിലെ 10.30 ഓടെ അദ്ദേഹം ചൗധരി ചരൺ സിംഗ് വിമാനത്താവളത്തിൽ എത്തും. ഡിഫൻസ് എക്സ്പോ ഗ്രൗണ്ടിൽ ബിജെപിയുടെ അംഗത്വ ക്യാമ്പെയ്ന് തുടക്കം കുറിക്കുകയാണ് ആദ്യ പരിപാടി. അടുത്ത വർഷം നടക്കുന്ന നിയമസഭാ തെരഞ്ഞെടുപ്പിന് മുന്നോടിയായിട്ടാണ് അംഗത്വ ക്യാമ്പെയ്ൻ നടക്കുന്നത്.
എൽഇഡി പ്രചാരണ വാഹനങ്ങളുടെ ഫ്ളാഗ് ഓഫും അമിത് ഷാ നിർവ്വഹിക്കും. പാർട്ടി ആസ്ഥാനത്ത് എത്തുന്ന അദ്ദേഹം മുതിർന്ന കാര്യകർത്താക്കളുമായും ഇൻ ചാർജ്ജുമാരുമായും സംവദിക്കും. മുൻ എംഎൽഎമാരും എംപിമാരും ഉൾപ്പെടുന്ന ജനപ്രതിനിധികളെയും പാർട്ടി പ്രവർത്തകരെയും അദ്ദേഹം അഭിസംബോധന ചെയ്യും.
യുപി തെരഞ്ഞെടുപ്പിന് മുന്നോടിയായി ബിജെപി പ്രചാരണ പരിപാടികളും അടിസ്ഥാന പ്രവർത്തനങ്ങളും നേരത്തെ തുടങ്ങിയിരുന്നു. അമിത് ഷായുടെ വരവ് പ്രവർത്തകർക്ക് കൂടുതൽ ആവേശം നൽകുമെന്നാണ് സംസ്ഥാന നേതൃത്വത്തിന്റെ വിലയിരുത്തൽ.
