തിരുവനന്തപുരം : ഒന്നര വർഷത്തിന് ശേഷം സ്കൂളിലേക്ക് പോകുന്ന വിദ്യാർത്ഥികൾക്കും അദ്ധ്യാപകർക്കും ആശംസകൾ നേർന്ന് നടൻ മനോജ് കെ ജയൻ. ഫേസ്ബുക്കിലൂടെയാണ് അദ്ദേഹം ആശംസകൾ നേർന്നത്. അദ്ധ്യാപകർക്കും വിദ്യാർത്ഥികൾക്കും, രക്ഷിതാക്കൾക്കും നല്ലൊരു ദിനം ആശംസിക്കുന്നുവെന്നും അദ്ദേഹം പറഞ്ഞു.
അങ്ങിനെ 20 മാസത്തെ ‘ഇമ്മിണി ബല്യ അവധിക്കു’ ശേഷം ഇന്ന് കേരളത്തിലെ സ്കൂളുകൾ തുറക്കുകയാണെന്ന് മനോജ് കെ ജയൻ ഫേസ്ബുക്കിൽ കുറിച്ചു. എന്റെ കൊച്ചു കൂട്ടുകാർക്ക്…വിദ്യാർത്ഥി വിദ്യാർത്ഥിനികൾക്ക് ,ഹൃദയം നിറഞ്ഞ ആശംസകൾ. കൂടെ അദ്ധ്യാപകർക്കും…രക്ഷിതാക്കൾക്കും .നല്ലൊരു ദിവസം ആശംസിക്കുന്നുവെന്നും അദ്ദേഹം ഫേസ്ബുക്ക് പോസ്റ്റിലൂടെ വ്യക്തമാക്കി.
തന്റെ കാലത്ത് 20 മാസത്തെ അവധി കിട്ടിയില്ലല്ലോ എന്നോർത്ത് കരയുകയാണെന്നും അദ്ദേഹം കൂട്ടിച്ചേർത്തു. സീനിയേഴ്സ് എന്ന സിനിമയിൽ സഹതാരങ്ങൾക്കൊപ്പം കരഞ്ഞു കൊണ്ടിരിക്കുന്ന ചിത്രവും കുറിപ്പിനൊപ്പം മനോജ് കെ ജയൻ പങ്കുവെച്ചിട്ടുണ്ട്.
രാവിലെ എട്ടരയോടെ പ്രവേശനോത്സവത്തിന്റെ ഔദ്യോഗിക ഉദ്ഘാടനം തിരുവനന്തപുരം കോട്ടൻ ഹിൽ സ്കൂളിൽ പൂർത്തിയായതോടെയാണ് കൊറോണയ്ക്ക് ശേഷമുള്ള അദ്ധ്യയന വർഷത്തിന് തുടക്കമായത്. 1 മുതൽ ഏഴ് വരെയുള്ള ക്ലാസുകളും, പത്ത്, പ്ലസ് ടു ക്ലാസുകളുമാണ് തുറക്കുന്നത്.
