കൊച്ചി : ജനങ്ങളെ ഉപദ്രവിക്കാത്ത രീതിയിലാവണം സമരങ്ങൾ നടത്തുന്നതെന്ന് ഡി.വൈ.എഫ്.ഐ. അഖിലേന്ത്യ അദ്ധ്യക്ഷൻ എ എ റഹീം. പ്രതിഷേധങ്ങളിൽ ജനങ്ങളുടെ സഹകരണം ആവശ്യമാണ് . പൊതുജനങ്ങളെ ബുദ്ധിമുട്ടിക്കാത്ത സമരങ്ങളാകണം രാഷ്ട്രീയ പാർട്ടികൾ നടത്തേണ്ടത്.
ഇന്ധന വിലവർധനക്കെതിരെ സമരം ചെയ്യാനുള്ള രാഷ്ട്രീയവും ധാർമികവുമായ അവകാശം കോൺഗ്രസിനില്ല . കോൺഗ്രസ് രാജ്യം ഭരിക്കുമ്പോൾ ഇന്ധന വില നിർണയാധികാരം കമ്പനികൾക്ക് നൽകിയത് കാരണമാണ് വില അടിക്കടി കൂടുന്നത്.
ജോജു ജോർജിന്റെ കാർ അടിച്ചു തകർത്ത നടപടി കോൺഗ്രസിന്റെ ധിക്കാരമാണ്. കെ.സുധാകരന്റെ നേതൃത്വത്തിൽ കോൺഗ്രസ് ഒരു ഗുണ്ടാ സംഘമായി മാറിയിരിക്കുന്നു .
ഇന്ധന വിലവർധന ഒരു പ്രധാനപ്പെട്ട പ്രശ്നമാണ്. ഏത് ജനകീയ വിഷയമായ സമരമാണെങ്കിലും അത് പരമാവധി ജനങ്ങൾക്ക് ബുദ്ധിമുട്ട് ഉണ്ടാകാതെ നടത്താനുള്ള ഉത്തരവാദിത്തം അത് നടത്തുന്ന രാഷ്ട്രീയ പാർട്ടികൾക്കുണ്ടെന്നും റഹീം പറഞ്ഞു .
വൈറ്റില- ഇടപ്പള്ളി ദേശീയപാത തടഞ്ഞ് കോണ്ഗ്രസ് നടത്തിയ സമരത്തിനിടെയാണ് ജോജു ജോര്ജ് പ്രതിഷേധിച്ചത്. തുടർന്ന് സമരം അവസാനിപ്പിച്ച് വാഹനം കടത്തിവിട്ടു. അതിനിടെ സമരക്കാര് ജോജുവിന്റെ കാറിന്റെ പിന്നിലെ ചില്ല് തല്ലിത്തകര്ത്തിരുന്നു. ‘ഞാനേറെ ഇഷ്ടപ്പെട്ട് വാങ്ങിയ വാഹനത്തിന്റെ അവസ്ഥ കണ്ടോ’ എന്നായിരുന്നു തകര്ന്ന ചില്ലു കാണിച്ച് മാദ്ധ്യമപ്രവര്ത്തകരോട് ജോജുവിന്റെ പ്രതികരണം.
Comments