കൊച്ചി : നാർകോട്ടിക് ജിഹാദ് പരാമർശം നടത്തിയ സംഭവത്തിൽ പാലാ ബിഷപ്പ് മാർ ജോസഫ് കല്ലറങ്ങാട്ടിലിനെതിരെ കേസെടുത്ത് പോലീസ്. പാലാ മജിസ്ട്രേറ്റ് കോടതിയുടെ നിർദ്ദേശപ്രകാരം കുറവിലങ്ങാട് പോലീസ് ആണ് കേസെടുത്തത്. ഓൾ ഇന്ത്യ ഇമാംസ് കൗൺസിൽ കോട്ടയം ജില്ലാ പ്രസിഡന്റ് നൽകിയ ഹർജിയിലാണ് നടപടി. മതസ്പർധ വളർത്തിയെന്ന കുറ്റം ചുമത്തിയാണ് കേസ് രജിസ്റ്റർ ചെയ്തിരിക്കുന്നത്.
കുറവിലങ്ങാട് പള്ളിയിൽ പാലാ ബിഷപ്പ് നടത്തിയ പരാമർശം വൻ വിവാദങ്ങൾക്ക് വഴിവെച്ചിരുന്നു. ക്രിസ്ത്യൻ യുവാക്കളെയും പെൺകുട്ടികളെയും ലക്ഷ്യം വെച്ച് ഒരു കൂട്ടം ആളുകൾ പ്രവർത്തിക്കുന്നുണ്ടെന്നും, കേരളത്തിലും ഇത്തരത്തിലുളള സംഘങ്ങൾ ഉണ്ടെന്നുമാണ് ബിഷപ്പ് പറഞ്ഞത്. മയക്കുമരുന്ന് ഉൾപ്പെടെയുള്ളവയ്ക്ക് യുവാക്കളെ അടിമകളാക്കാനുള്ള ശ്രമങ്ങളാണ് നടക്കുന്നത്. അതിനാൽ കുട്ടികളുടെ കാര്യത്തിൽ രക്ഷിതാക്കൾ ജാഗ്രത പുലർത്തണമെന്നും ബിഷപ്പ് പ്രസംഗത്തിൽ വ്യക്തമാക്കിയിരുന്നു. ഒരു വിഭാഗത്തെയും എടുത്ത് പറയാതെയാണ് ബിഷപ്പ് ഇക്കാര്യം അറിയിച്ചത്.
എന്നാൽ ഇതിനെതിരെ വ്യാപക പ്രതിഷേധങ്ങളാണ് ഉയർന്നത്. നാർകോട്ടിക് ജിഹാദ് പരാമർശം ഒരു വിഭാഗം ആളുകളെ ലക്ഷ്യം വെച്ച് നടത്തിയ ആക്രമണമാണെന്നും ബിഷപ്പ് പ്രസ്താവന പിൻവലിക്കണമെന്നുമുള്ള ആവശ്യങ്ങൾ ഉയർന്നിരുന്നു.
