തിരുവനന്തപുരം : സംസ്ഥാനത്തെ ആംബുലൻസ് ഡ്രൈവർമാർക്ക് പ്രത്യേക പരിശീലനം നൽകുമെന്ന് ഗതാഗത മന്ത്രി ആന്റണി രാജു.ഐഎംഎയുമായി സഹകരിച്ചാണ് പ്രത്യേക പരിശീലനം നൽകുക. ആംബുലൻസുകളുടെ സേവനം സംസ്ഥാനത്ത് ഉടനീളം ഏകോപിപ്പിക്കുവാനും നിലവാരം ഉയർത്താനും പുതിയ മാനദണ്ഡങ്ങൾ തയ്യാറാക്കുമെന്ന് മന്ത്രി കൂട്ടിച്ചേർത്തു.
സംസ്ഥാനത്തെ അനധികൃത ആംബുലൻസുകളെ നിയന്ത്രിക്കാൻ നിരീക്ഷണം ശക്തമാക്കുമെന്ന് മന്ത്രി വ്യക്തമാക്കി. ഇതിന്റെ ഭാഗമായി ആംബുലൻസ് ഡ്രൈവർമാർക്ക് പോലീസ് വെരിഫിക്കേഷൻ നിർബന്ധമാക്കും.
ആംബുലൻസുകൾക്ക് പ്രത്യേക നമ്പർ നൽകും.അംഗീകൃത ഡിസൈനും നിറവും ലൈറ്റും സൈറണും ഹോണും മാത്രമേ ഉപയോഗിക്കാവു എന്ന് നിർദ്ദേശമുണ്ട്. ആംബുലൻസുകളെ മൂന്നായി തരം തിരിച്ച് സംസ്ഥാനത്തുടനീളം പ്രത്യേക നിരക്ക് ഏർപ്പെടുത്തുമെന്ന് മന്ത്രി കൂട്ടിച്ചേർത്തു.
