മുംബൈ: വിമാനത്താവളത്തിന് സമീപത്തെ കാർഗോ കോംപ്ലക്സിൽ നിന്നും നാല് കോടി വിലവരുന്ന 700 ഗ്രാം ഹെറോയിൻ പിടികൂടിയ സംഭവത്തിൽ ഗുജറാത്ത് സ്വദേശി അറസ്റ്റിൽ. വഡോദര സ്വദേശി കൃഷ്ണ മുരാരി പ്രസാദാണ് നർക്കോട്ടിക് കൺട്രോൾ ബ്യൂറോയുടെ(എൻസിബി) പിടിയിലായത്.
സബർബൻ മുംബൈയിലെ അന്താരാഷ്ട്ര കൊറിയർ ടെർമിനൽ വഴി മയക്കുമരുന്ന് കടത്തുന്നുണ്ടെന്ന വിവരത്തിന്റെ അടിസ്ഥാനത്തിൽ തിങ്കളാഴ്ചയാണ് എൻസിബി പരിശോധന നടത്തിയത്. തുടർന്ന് 700 ഗ്രാം ഹെറോയിൻ പിടികൂടുകയായിരുന്നു. കേസ് രജിസ്റ്റർ ചെയ്ത ശേഷം പാഴ്സലിലുള്ള വിലാസം കേന്ദ്രീകരിച്ച് എൻസിബി അന്വേഷണം ആരംഭിച്ചിരുന്നു.
അന്വേഷണത്തിന്റെ ഭാഗമായി കൃഷ്ണ മുരാരി പ്രസാദിനെ മൊഴി രേഖപ്പെടുത്താൻ മുംബൈയിലെ എൻ.സി.ബി ഓഫിസിലേക്ക് വിളിച്ചുവരുത്തി. ചോദ്യംചെയ്യലിനു ശേഷം ഇയാളെ അറസ്റ്റ് ചെയ്യുകയായിരുന്നു. സംഭവത്തിൽ കൂടുതൽ അന്വേഷണം നടത്തിവരികയാണ്.
