കൊച്ചി: മുൻ മിസ് കേരള അൻസി കബീറിന്റേയും റണ്ണർ അപ്പ് അഞ്ജന ഷാജന്റേയും മരണവുമായി ബന്ധപ്പെട്ട് കൊച്ചി നമ്പർ 18 ഹോട്ടലിൽ പോലീസ് പരിശോധന. ഈ ഹോട്ടലിൽ നടന്ന പാർട്ടിക്ക് ശേഷം തിരികെ മടങ്ങുമ്പോഴാണ് വാഹനാപകടം ഉണ്ടായത്. ഇവർക്കൊപ്പം ഉണ്ടായിരുന്ന തൃശൂർ സ്വദേശി മുഹമ്മദ് ആഷിഖ് കഴിഞ്ഞ ദിവസം മരിച്ചിരുന്നു. വാഹനത്തിന്റെ ഡ്രൈവറും മാള സ്വദേശിയുമായ അബ്ദുൾ റഹ്മാന്റെ അറസ്റ്റ് പോലീസ് കഴിഞ്ഞ ദിവസം രേഖപ്പെടുത്തിയിട്ടുണ്ട്. മദ്യപിച്ചാണ് വാഹനം ഓടിച്ചതെന്ന് ഇയാൾ പോലീസിന് മൊഴി നൽകിയിരുന്നു.
ഇയാളുടെ മൊഴിയുടെ അടിസ്ഥാനത്തിലാണ് ഹോട്ടലിൽ പരിശോധന നടത്തുന്നത്. ഇയാൾ മദ്യം ഉപയോഗിച്ചതിന് തെളിവ് ശേഖരിക്കുന്നതിന് പുറമെ, മറ്റേതെങ്കിലും ലഹരി വസ്തുക്കൾ ഉപയോഗിച്ചിരുന്നോ എന്ന കാര്യവും പരിശോധിക്കും. ഹോട്ടലിലെ സിസിടിവി ദൃശ്യങ്ങൾ ഉൾപ്പെടെ പരിശോധിക്കുന്നുണ്ട്.
ഈ മാസം ഒന്നിന് പുലർച്ചെയാണ് ദേശീയപാതയിൽ നിയന്ത്രണം വിട്ട കാർ മീഡിയനിലെ മരത്തിൽ ഇടിച്ച് അപകടമുണ്ടായത്. അൻസിയും അഞ്ജനയും സംഭവ സ്ഥലത്ത് വച്ച് തന്നെ മരിച്ചിരുന്നു. ചികിത്സയിലായിരുന്ന മുഹമ്മദ് ആഷിഖ് കഴിഞ്ഞ ദിവസമാണ് മരിച്ചത്.
Comments