ശ്രീനഗർ : ഇസ്ലാമിക ഭീകര സംഘടനയായ ഇസ്ലാമിക് സ്റ്റേറ്റുമായി ആർഎസ്എസിനെയും ബിജെപിയേയും താരതമ്യം ചെയ്ത പിഡിപി നേതാവ് മെഹബൂബ മുഫ്തിയ്ക്ക് കണക്കിന് കൊടുത്ത് ബിജെപി. മെഹ്ബൂബയ്ക്ക് ബുദ്ധിസ്ഥിരതയില്ലെന്ന് ബിജെപി നേതാവ് കവീന്ദർ ഗുപ്ത പറഞ്ഞു. ജമ്മു കശ്മീരിന്റെ സമാധാനം മെഹബൂബയ്ക്ക് രസിക്കുന്നില്ലെന്നും അദ്ദേഹം വിമർശിച്ചു.
ബിജെപിയേയും ആർഎസ്എസിനേയും ഐസുമായി താരതമ്യം ചെയ്തതിലൂടെ തനിക്ക് ബുദ്ധി സ്ഥിരതയില്ലെന്നാണ് മെഹബൂബ തെളിയിക്കുന്നത്. ബുദ്ധിയുണ്ടെങ്കിൽ ഇങ്ങനെ സംസാരിക്കാൻ വനിതാ നേതാവിന് കഴിയില്ല. ജമ്മു കശ്മീരിലെ സമാധാന അന്തരീക്ഷം മെഹബൂബയെ വല്ലാതെ അസ്വസ്ഥമാക്കുന്നുണ്ട്. കശ്മീർ എന്നും അസ്വസ്ഥമാകണമെന്നാണ് മെഹബൂബയുടെ ആവശ്യമെന്നും അദ്ദേഹം ഗുപ്ത കുറ്റപ്പെടുത്തി. ഹിന്ദുത്വത്തെക്കുറിച്ച് അടുത്തിടെ മോശം പരാമർശങ്ങൾ ഉന്നയിച്ച കോൺഗ്രസ് നേതാക്കളായ സൽമാൻ ഖുർഷിദ്, റാഷിദ് അൽവി എന്നിവരെയും അദ്ദേഹം വിമർശിച്ചു.
എല്ലാ മതങ്ങളുടെയും തുല്യതയെക്കുറിച്ചാണ് ബിജെപി സംസാരിക്കുന്നത്. തങ്ങൾക്ക് ആരുടെയും സർട്ടിഫിക്കറ്റിന്റെ ആവശ്യമില്ല. മെഹബൂബയെപോലുള്ളവരുടെ പരാമർശങ്ങൾ സമൂഹത്തിന്റെ വിഭജനത്തിന് കാരണമാകുമെന്നും അദ്ദേഹം ചൂണ്ടിക്കാട്ടി.
കഴിഞ്ഞ ദിവസമായിരുന്നു ആർഎസ്എസിനെയും ബിജെപിയേയും മെഹബൂബ ഐസുമായി താരതമ്യം ചെയ്തത്. എല്ലാ വർഗ്ഗീയ പാർട്ടികളെയും ഐസുമായി താരതമ്യം ചെയ്യാമെന്നും ഇവർക്കെല്ലാം ഹിന്ദുക്കളും മുസ്ലീങ്ങളും തമ്മിലടിക്കണമെന്നാണ് ആഗ്രഹമെന്നുമാണ് മെഹബൂബ പറഞ്ഞത്.
