ഐശ്വര്യത്തിന്റെ പ്രതീകമായി ഇന്ന് തൃക്കാർത്തിക. വൃശ്ചികമാസത്തിലെ തൃക്കാർത്തിക നാളിൽ നടത്തിവരാറുള്ള പ്രധാന ഹൈന്ദവാഘോഷമാണിത്. ഭഗവതിയുടെയും സുബ്രഹ്മണ്യന്റെയും വിശേഷദിവസമായാണ് തൃക്കാർത്തിക കണക്കാക്കുന്നത്. മൺചെരാതുകളിൽ ദീപം തെളിയിച്ച് ദേവിയെ സ്തുതിച്ച് ഈ ദിനം നാടെങ്ങും ആഘോഷിക്കുന്നു. അറിയാം തൃക്കാർത്തികയ്ക്കു പിന്നിലെ ഐതീഹ്യം.
ദേവാസുര യുദ്ധത്തിൽ മഹിഷാസുരനെ വധിക്കാൻ ഉപായം കാണാതെ ദേവകൾ എല്ലാവരും ദുഖിതരായി ബ്രഹ്മാവിന്റെ അടുത്ത് ചെന്നു. എന്നാൽ ഇതിനൊരു ഉപായം ബ്രഹ്മാവിന് കാണുവാൻ സാധിച്ചില്ല. അങ്ങനെ എല്ലാ ദേവകളും മഹാവിഷ്ണുവിനെയും പരമശിവനെയും കാണാൻ ചെന്നു. വിവരങ്ങൾ എല്ലാം അറിഞ്ഞു കുപിതരായ ഇവർ മഹിഷാസുരനെ വധിക്കാൻ ആയി ഒരു നാരി രൂപത്തെ സൃഷ്ടിച്ചു.
ഓരോ ദേവന്മാരുടെയും ശക്തി ദേവിയുടെ ഓരോ അവയവം ആയി തീർന്നു. ബ്രഹ്മാവിന്റെ മുഖത്തുനിന്നും ഒരു തേജസ് പുറപ്പെട്ടു. പരമശിവനിൽ നിന്നും ഘോരാക്രിതി പൂണ്ട ശക്തി ജനിച്ചു, വിഷ്ണുവിൽ നിന്നും നീല നിറത്തിൽ ഒരു തേജസ് വന്നു. ഇവ എല്ലാം കൂടിചേർന്നു പതിനെട്ടു കരങ്ങളോട് കൂടിയ ജഗത് മോഹിനി രൂപംകൊണ്ടു. ആ രൂപം കണ്ടു ദേവകൾ സന്തുഷ്ടരായി. ദേവലോകത്തെ മഹിഷന്റെ അടിമത്തത്തിൽ നിന്നും മോചിപ്പികാനായി രൂപമെടുത്ത മഹാമായയെ അവർ വാഴ്ത്തി. മഹിഷാസുര നിഗ്രഹം കഴിഞ്ഞു വന്ന ദേവിയെ സ്തുതിച്ചാണ് കേരളത്തിൽ തൃക്കാർത്തിക ആഘോഷിക്കുന്നത്.
തമിഴ്നാട്ടിൽ ഇതിനെ ഭരണി ദീപം എന്നും വിഷ്ണു ദീപം എന്നും പറയപ്പെടുന്നു. സുബ്രഹ്മണ്യന്റെ ജന്മദിവസമായും കാർത്തിക തമിഴ്നാട്ടിൽ ആഘോഷിക്കുന്നു. പരമശിവന്റെ ദിവ്യ പ്രഭയിൽ നിന്നും കാർത്തിക ദേവിയുടെസഹായത്താൽ സുബ്രഹ്മണ്യൻ ഉണ്ടായി എന്നൊരു വിശ്വാസവും ഉണ്ട്.
ഇതിനു പുറമേ, തുളസീ ദേവിയുടെ ജനനം തൃക്കാർത്തിക നക്ഷത്രത്തിൽ ആയിരുന്നു എന്നും, സുബ്രഹ്മണ്യനെ എടുത്തു വളർത്തിയത് കാർത്തിക നക്ഷത്രത്തിന്റെ അധിദേവന്മാരായ കൃത്തികാ ദേവിമാരായിരുന്നു എന്നും വിശ്വാസമുണ്ട്. തൃക്കാർത്തിക ദീപം തെളിയിക്കുന്ന വീടുകളിൽ മഹാലക്ഷി വസിക്കും എന്നും ഐതിഹ്യം പറയുന്നു.
അഗ്നി നക്ഷത്രമാണ് കാർത്തിക. ഇത് ജ്ഞാനത്തിന്റെയും ആഗ്രഹ സാഫല്യത്തിന്റെയും ശുഭത്വത്തിന്റെയും പ്രതീകം കൂടിയാണ്. കാർത്തിക നക്ഷത്രവും പൗർണ്ണമിയും ഒരുമിച്ചു വരുന്ന തൃക്കാർത്തിക ദിനത്തിലാണ് ഈ നക്ഷത്രത്തിന് പൂർണ്ണബലം സിദ്ധിക്കുന്നത് എന്ന് പറയപ്പെടുന്നു.
മനസ്സിലെ കല്മഷം മാറ്റി മനശുദ്ധി കൈവരിക്കാൻ മൺചെരാതുകളിലെ കാർത്തിക ദീപങ്ങൾക്ക് കഴിയുന്നു എന്നതാണ് തൃക്കാർത്തികയുടെ പ്രാധാന്യം.
Comments