മുംബൈ: സ്ലാവിയ അവതരിപ്പിച്ചുകൊണ്ട് ഇന്ത്യ 2.0 പ്രോജക്റ്റിലെ അടുത്ത ഘട്ടത്തിന് സ്കോഡ ഓട്ടോ തുടക്കം കുറിച്ചിരിക്കുകയാണ്. ഇടത്തരം എസ് യുവിയായ കുശാഖിന്റെ വിജയകരമായ അവതരണത്തിനു പിന്നാലെ ചെക്ക് കാർ നിർമ്മാതാക്കളുടെ രണ്ടാമത്തെ ഇന്ത്യൻ നിർദ്ദിഷ്ട മോഡലാണ് ഈ ബ്രാൻഡ്-ന്യൂ സെഡാൻ.
സ്ലാവിയയുടെ 95 ശതമാനം നിർമ്മാണവും പ്രാദേശികമായാണ് നടപ്പാക്കിയിരിക്കുന്നത്. ഈ സെഡാൻ ഇന്ത്യയ്ക്കായി സ്കോഡ ഓട്ടോ പ്രത്യേകമായി രൂപകൽപ്പന ചെയ്ത MQB വേരിയന്റായ MQB-A0-IN പ്ലാറ്റ്ഫോമിനെ അടിസ്ഥാനമാക്കിയാണ് നിർമ്മിച്ചിരിക്കുന്നത്. അതിനാൽ തന്നെ വാഹനം സമഗ്രമായ സുരക്ഷാ സവിശേഷതകളും വിപുലമായ ഇൻഫോടെയ്ൻമെന്റ് സിസ്റ്റവും വാഗ്ദാനം ചെയ്യുന്നു.
വാഹനപ്രേമികളുടെ സെഡാൻ സങ്കൽപ്പങ്ങൾക്ക് പുതുമ സമ്മാനിക്കുന്ന പല സവിശേഷതകളും സ്ലാവിയയിൽ ഒരുക്കിയിട്ടുണ്ട്. കൂടാതെ അഞ്ച് ആളുകൾക്ക് സുഖമായിരിക്കാൻ സാധിക്കുന്നു. 521 ലിറ്റർ ബൂട്ട് കപ്പാസിറ്റിയാണ് വാഹനത്തിനുള്ളത്. മുൻവശത്തെ ഹെഡ്ലൈറ്റുകളും ടെയിൽലൈറ്റുകളും നൂതന എൽഇഡി സാങ്കേതികവിദ്യയോടു കൂടിയതാണ്. ക്രോം പ്ലേറ്റഡ് ഡിസൈൻ ഫീച്ചറുകൾ, ടു-ടോൺ അലോയ് വീലുകൾ, എക്സ്ക്ലൂസീവ് സ്കോഡ ബാഡ്ജ് എന്നിവയെല്ലാം സ്ലാവിയയുടെ മറ്റ് സവിശേഷതകളാണ്. പുതിയ മെറ്റാലിക് ക്രിസ്റ്റൽ ബ്ലൂ, ടൊർണാഡോ റെഡ് പെയിന്റ് വർക്ക് എന്നിവ ഇന്ത്യൻ വിപണിയിലെ സ്കോഡയ്ക്ക് മാത്രമായി നൽകിയതാണ്.
ഫോക്സ്വാഗൺ ഗ്രൂപ്പിന്റെ മോഡുലാർ ട്രാൻസ്വേർസ് മാട്രിക്സിന്റെ ഒരു വകഭേദമായ MQB-A0-IN ആണ് പുതിയ സ്കോഡ മോഡലുകൾക്ക് സാങ്കേതിക അടിത്തറ നൽകുന്നത്. സ്കോഡ ഓട്ടോ ഈ പ്ലാറ്റ്ഫോം ഇന്ത്യൻ വിപണിക്ക് വേണ്ടി പ്രത്യേകമായി ഒരുക്കിയിരിക്കുന്നതാണ്. കൂടാതെ ഇത് രാജ്യത്തിന്റെ പുതിയ, സുരക്ഷ, എമിഷൻ മാനദണ്ഡങ്ങൾ നിറവേറ്റുകയും ചെയ്യുന്നു. 2019ന്റെ തുടക്കത്തിൽ പൂനെയിലെ ടെക്നോളജി സെന്ററിൽ പ്രവർത്തനം ആരംഭിച്ച ടെക്നോളജി സെന്ററിലാണ് വാഹനങ്ങളുടെ ഭൂരിഭാഗം നിർമ്മാണവും നടക്കുന്നതെന്ന് സ്കോഡ അറിയിച്ചു. ഇന്ത്യയിൽ നിർമിക്കുന്ന ഇത്തരം മോഡലുകൾ മറ്റ് രാജ്യങ്ങളിലേക്കും കയറ്റുമതി ചെയ്യാൻ നിർമ്മാതാക്കൾക്ക് പദ്ധതിയുണ്ട്.
Comments