ന്യൂയോർക്ക് : ഇലോൺ മസ്കിന്റെ കമ്പനിയ്ക്കെതിരെ ലൈംഗിക ചൂഷണത്തിന് പരാതി നൽകി ജീവനക്കാരി. ടെസ്ലക്ക് കീഴിലെ ഇലക്ട്രിക് കാർ കമ്പനിയ്ക്കെതിരെയാണ് പ്രൊഡക്ഷൻ അസോസിയേറ്റ് ആയ ജെസിക ബറാസ പരാതി നൽകിയത്. കഴിഞ്ഞ മൂന്ന് വർഷമായി കമ്പനിയിൽ നിന്നും ലൈംഗിക ചൂഷണം നേരിടുകയാണെന്ന് ബറാസയുടെ പരാതിയിൽ പറയുന്നു.
കാലിഫോർണിയയിലെ ഫ്രെമോണ്ടിലുള്ള കമ്പനിയ്ക്കെതിരെയാണ് പരാതിയുമായി ജീവനക്കാരി രംഗത്ത് വന്നിരിക്കുന്നത്. കമ്പനിയിൽ സ്ത്രീകൾക്ക് പൂർണമായും സുരക്ഷ നഷ്ടപ്പെട്ടതായി പരാതി നൽകിയ ശേഷം ബറാസ പ്രതികരിച്ചു. കമ്പനിയിലെ ജോലി ആളുകളെ മനുഷ്യരല്ലാതെയാക്കും. കഴിഞ്ഞ മൂന്ന് വർഷമായി കടുത്ത പീഡനങ്ങളാണ് സഹപ്രവർത്തകരിൽ നിന്നും നേരിടുന്നത്. ഇത് അസഹനീയമായ സാഹചര്യത്തിലാണ് പരാതി നൽകിയതെന്നും ജീവനക്കാരി വ്യക്തമാക്കി. ടെസ്ല മോഡൽ 3 യുടെ പ്രൊഡക്ഷൻ അസോസിയേറ്റ് ആണ് ബറാസ.
ഓഫീസിൽ എത്തുമ്പോൾ ചിലർ ശരീരത്തെക്കുറിച്ച് ലൈംഗിക ചുവയോടെ സംസാരിക്കാറുള്ളതായി ബറാസ പരാതിയിൽ വ്യക്തമാക്കി. പലപ്പോഴും തന്റെ ശരീരത്തിൽ സഹപ്രവർത്തകർ മോശമായി സ്പർശിക്കാറുണ്ട്. ഓഫീസിലെ അന്തരീക്ഷം പലപ്പോഴും അവധിയെടുക്കാൻ പ്രേരിപ്പിച്ചു. തന്റെ സഹപ്രവർത്തകരുടെയും അവസ്ഥ സമാനമാണ്. തന്നെപ്പോലെ നിരവധി തവണ അവരും സഹപ്രവർത്തകരുടെ മോശം പെരുമാറ്റത്തിനും ഭീഷണിയ്ക്കും ഇരയായിട്ടുണ്ടെന്നും ബറാസ പരാതിയിൽ ആരോപിച്ചു. തനിക്കും സഹപ്രവർത്തകർക്കും മികച്ച അന്തരീക്ഷത്തിൽ കമ്പനിയിൽ ജോലി തുടരാനുള്ള അന്തരീക്ഷം ഒരുക്കണമെന്നും പരാതിയിൽ ബറാസ ആവശ്യപ്പെട്ടു.
