തിരുവനന്തപുരം; പാലക്കാട് സഞ്ജിത്തിന്റെ കൊലപാതകത്തിൽ പ്രതികൾക്ക് പോലീസിന്റെ സഹായം ലഭിച്ചുവെന്നാണ് കരുതുന്നതെന്ന് ബിജെപി സംസ്ഥാന അദ്ധ്യക്ഷൻ കെ. സുരേന്ദ്രൻ. കൊലപാതകം നടന്നിട്ട് ഒരാഴ്ചയായിട്ടും പ്രതികളെക്കുറിച്ച് പോലീസിന് ഒരു തുമ്പും ലഭിച്ചില്ലെന്ന് പറയുന്നത് അവിശ്വസനീയമാണെന്നും അദ്ദേഹം പറഞ്ഞു.
മതഭീകരവാദ ശക്തികളെ കേരള പോലീസ് സഹായിക്കുകയാണ്. ദൃക്സാക്ഷികളിൽ ഒരാൾ പോലീസുകാരനായിട്ട് കൂടി നടപടികൾ സ്വീകരിക്കുന്നതിൽ വലിയ വീഴ്ചയാണ് സംഭവിച്ചിരിക്കുന്നത്. സംസ്ഥാനത്ത് ഇതിന് മുമ്പ് നടന്ന ഭീകരവാദ കൊലപാതകങ്ങളിലും ഇത്തരം സമീപനമുണ്ടായിട്ടുണ്ട്. അതിനാൽ കേസ് എൻഐഎ അന്വേഷിക്കണമെന്നാണ് ബിജെപിക്ക് ആവശ്യപ്പെടാനുള്ളതെന്നും ഇതിനായി പ്രക്ഷോഭം ശക്തിപ്പെടുത്തുമെന്നും സുരേന്ദ്രൻ പറഞ്ഞു.
കേസിൽ തീവ്രവാദ ബന്ധം വളരെ പ്രകടമാണ്. പരിശീലനം സിദ്ധിച്ച കൊലയാളികൾ, ഉപയോഗിച്ച ആയുധം എന്നിവയെല്ലാം കൊലപാതകത്തിൽ തീവ്രവാദികൾക്കുള്ള പങ്കാണ് സൂചിപ്പിക്കുന്നത്. അതിനാലാണ് കേസ് ദേശീയ അന്വേഷണ ഏജൻസിക്ക് കൈമാറണമെന്ന് ആവശ്യപ്പെടുന്നത്. ഇക്കാര്യത്തിൽ കേരളത്തിലെ ബിജെപി പ്രവർത്തകർക്കും ബഹുജനങ്ങൾക്കുമുള്ള ആശങ്ക കേന്ദ്ര ആഭ്യന്തരമന്ത്രി അമിത് ഷായെ അറിയിക്കുമെന്നും സുരേന്ദ്രൻ വ്യക്തമാക്കി.
Comments