ചെറിയ ഇടവേളയ്ക്ക് ശേഷം തീയേറ്ററുകൾ ആഘോഷമാക്കി എത്തിയ സുരേഷ് ഗോപി ചിത്രമാണ് കാവൽ.മാസ് പരിവേഷവുമായി എത്തിയ ആക്ഷൻ സൂപ്പർസ്റ്റാറിന്റെ കാവലിന് മികച്ച പ്രതികരണമാണ് ആദ്യ ഷോയ്ക്ക് ശേഷം ലഭിക്കുന്നത്. കാവൽ സിനിമ കണ്ട് ഇറങ്ങുന്നവരുടെ മനസിൽ സുരേഷ് ഗോപിയുടേയും മറ്റ് താരങ്ങളുടേയും പ്രകടനത്തിനോടൊപ്പം തങ്ങി നിൽക്കുന്ന ഒരു പാട്ടുണ്ട്. കാർമേഘം മൂടുന്നു എന്ന പാട്ട് വളരെപ്പെട്ടെന്നാണ് ജനഹൃദയങ്ങൾ കീഴടക്കി മുന്നേറുന്നത്. സന്തോഷ് എന്ന പുതുമുഖമാണ് ഗാനം ആലപിച്ചത്. സിനിമാലോകവുമായി യാതൊരു പരിചയവുമില്ലാത്ത സന്തോഷിന്റെ ഏറെ കാലമായുള്ള ആഗ്രഹം നടത്തികൊടുത്തത് നടൻ സുരേഷ് ഗോപിയാണ്.
സുരേഷ് ഗോപി അവതാരകനായ ‘നിങ്ങൾക്കുമാകാം കോടീശ്വരൻ’ എന്ന പരിപാടിയിലൂടെയാണ് സന്തോഷിന്റെ ജീവിതം മാറി മറിയുന്നത്. പരിപാടിയിൽ മത്സരാർഥിയായിരുന്ന ഭാര്യ സംഗീതക്കൊപ്പം പങ്കെടുത്തതായിരുന്നു സന്തോഷ്. രണ്ടാം വയസ്സിൽ പോളിയോ ബാധിച്ച് ഇരു കാലുകളും തളർന്നുപോയ സന്തോഷിന്റെയും ഭാര്യ സംഗീതയുടേയും ജീവിതം തന്നെ മാറ്റിമറിച്ച കൂടിക്കാഴ്ചയായിരുന്നു സുരേഷ് ഗോപിയുമായി അന്ന് നടന്നതെന്ന് പിന്നീട് ആണ് ദമ്പതിമാർ തിരിച്ചറിഞ്ഞത്.
പരിപാടിയിൽ പങ്കെടുക്കവെ പാട്ടുകാരനാണെന്നു പറഞ്ഞതോടെ സുരേഷ് ഗോപി സന്തോഷിനോട് ഒരു പാട്ട് പാടാൻ ആവശ്യപ്പെടുകയായിരുന്നു. പവിത്രം എന്ന സിനിമയിൽ യേശുദാസ് പാടിയ ‘ശ്രീരാഗമോ’ എന്ന ഗാനം മനോഹരമായി സന്തോഷ് പാടി. ഒപ്പം മരിക്കുന്നതിന് മുൻപ് സിനിമയിൽ പാടണമെന്ന ആഗ്രഹവും സന്തോഷ് പങ്കുവച്ചു. സന്തോഷിന്റെ ആഗ്രഹം കേട്ട സുരേഷ് ഗോപി സിനിമയിൽ പാടാൻ അവസരം നൽകാം എന്ന് വാക്ക് നൽകുകയായിരുന്നു.
സിനിമയിൽ പാടാൻ അവസരം നൽകാൻ ശ്രമിക്കാമെന്ന് പരിപാടിക്കിടെ സുരേഷ് ഗോപി പറഞ്ഞത് വെറുംവാക്കായില്ല. പരിപാടി കഴിഞ്ഞ ശേഷം കാവലിന്റെ സംവിധായകൻ നിഥിൻ രഞ്ജി പണിക്കർ സുരേഷ് ഗോപിയെ വിളിച്ച് സന്തോഷം അറിയിക്കുകയായിരുന്നു.
ഒടുവിൽ നിഥിൻ രഞ്ജി പണിക്കരുടെ ‘കാവൽ’ എന്ന സിനിമയിൽ പാടാനായി സന്തോഷിനു ക്ഷണം വന്നു. ‘കാർമേഘം മൂടുന്നു’ എന്ന പാട്ട് ഒറ്റ ടേക്കിൽ തന്നെ സന്തോഷ് പൂർത്തിയാക്കി. ഒറ്റഗാനം കൊണ്ടുതന്നെ പ്രേക്ഷക ഹൃദയത്തിൽ ഇടം പിടിക്കുകയാണ് സന്തോഷ്
തന്റെ വലിയ സ്വപ്നം മറക്കാതെ നിറവേറ്റി തന്ന സുരേഷ് ഗോപിക്ക് നന്ദി പറയുകയാണ് സന്തോഷും കുടുംബവും ഇപ്പോൾ.
Comments