കൊച്ചി: വിമാനത്തിന്റേതെന്നു തോന്നുന്ന ശബ്ദവുമായി നിരത്തിൽ അമിത വേഗതയിൽ പാഞ്ഞ ‘കാർ വിമാനം’ ഒടുവിൽ പിടിയിൽ. കാക്കനാട് ഇൻഫോപാർക്ക് എക്സ്പ്രസ് ഹൈവേയിലും കാക്കനാട്ടെ മറ്റ് റോഡുകളിലൂടെയും ചീറിപ്പാഞ്ഞ കാർ നാട്ടുകാരുടെ കാതടപ്പിക്കുകയായിരുന്നു. നാട്ടുകാരുടെ പരാതിയെ തുടർന്നാണ് എം.വി.ഡി ഇവരെ പിടികൂടിയത്.
എറണാകുളം ആർ.ടി. ഓഫീസിലെ മോട്ടോർ വെഹിക്കിൾ ഇൻസ്പെക്ടർ എ.ആർ രാജേഷാണ് കാർ ഓടിച്ചയാളെ പിടികൂടിയത്. വരാപ്പുഴ സ്വദേശി വിനീതാണ് കാറിന്റെ സൈലൻസറിൽ ഉൾപ്പെടെ രൂപമാറ്റം വരുത്തി നാട്ടുകാരുടെ ചെവി പൊട്ടിച്ചികൊണ്ടിരുന്നത്. സിസിടിവി ദൃശ്യങ്ങളുടെ സഹായത്തോടെയാണ് ഇയാളെ എം.വി.ഡി കണ്ടെത്തിയത്.
കാറിൽ രൂപമാറ്റം വരുത്തിയതിന് ഇയാളിൽ നിന്നും 11,000 രൂപ പിഴ ഈടാക്കി. കാറിന്റെ വീലുകളിലും, സ്റ്റിയറിങ്ങിലും ഇയാൾ രൂപമാറ്റം വരുത്തിയിരുന്നു. പിഴ ഈടാക്കിയ ശേഷം രണ്ട് ദിവസത്തിനകം രൂപമാറ്റം വരുത്തിയ ഭാഗങ്ങൾ പഴയത് പോലെയാക്കി ആർ.ടി ഓഫീസിൽ ഹാജരാക്കാൻ ഇയാൾക്ക് നിർദ്ദേശം നൽകി. ഹാജരാക്കാത്ത പക്ഷം കാറിന്റെ രജിസ്ട്രേഷൻ റദ്ദാക്കുമെന്ന് മോട്ടോർ വാഹന വകുപ്പ് മുന്നറിയിപ്പ് നൽകി.
Comments