ന്യൂഡൽഹി: പുതിയ കൊറോണ വകഭേദങ്ങളുടെ ആവിർഭാവത്തെത്തുടർന്നുണ്ടായ സാഹചര്യം വിലയിരുത്തി സെറം ഇൻസ്റ്റിറ്റ്യൂട്ട് ഓഫ് ഇന്ത്യ കോവിഷീൽഡിന് ബൂസ്റ്റർ ഡോസിനായി അനുമതി തേടി. ഡ്രഗ്സ് കൺട്രോളർ ജനറൽ ഓഫ് ഇന്ത്യയ്ക്ക് (ഡിസിജിഐ) ഇതുസംബന്ധിച്ച് അപേക്ഷ നൽകിയതായി ഔദ്യോഗിക വൃത്തങ്ങൾ അറിയിച്ചു.
യുകെയുടെ മെഡിസിൻസ് ആൻഡ് ഹെൽത്ത് കെയർ പ്രൊഡക്ട്സ് റെഗുലേറ്ററി ഏജൻസി ഇതിനകം ബൂസ്റ്റർ ഡോസ് അംഗീകരിച്ചതായി സെറം ഇൻസ്റ്റിറ്റ്യൂട്ട് ഓഫ് ഇന്ത്യയുടെ (എസ്ഐഐ) ഗവൺമെന്റ് ആൻഡ് റെഗുലേറ്ററി അഫയേഴ്സ് ഡയറക്ടർ പ്രകാശ് കുമാർ സിംഗ് അറിയിച്ചു. ലോകം മഹാമാരിയുടെ സാഹചര്യത്തെ അഭിമുഖീകരിക്കുന്നത് തുടരുമ്പോൾ, പല രാജ്യങ്ങളും കൊറോണ വാക്സിനുകളുടെ ബൂസ്റ്റർ ഡോസ് നൽകാൻ തുടങ്ങിയിട്ടുണ്ടെന്ന് അപേക്ഷയിൽ വ്യക്തമാക്കുന്നു.
ഇന്ത്യയിലെയും വിദേശ രാജ്യങ്ങളിലെയും പൗരന്മാർ ഇതിനകം രണ്ട് ഡോസ് കോവിഷീൽഡ് ഉപയോഗിച്ച് പൂർണ്ണമായും വാക്സിനേഷൻ നടത്തിയവരാണ്. ഈ സാഹചര്യത്തിൽ ബൂസ്റ്റർ ഡോസിനായി തുടർച്ചയായി അഭ്യർത്ഥിക്കുന്നുവെന്ന് അപേക്ഷയിൽ ചൂണ്ടിക്കാട്ടുന്നു. നമ്മുടെ രാജ്യത്ത് ഇപ്പോൾ കോവിഷീൽഡിന് ഒരു കുറവുമില്ലെന്നും ഇപ്പോൾ തന്നെ രണ്ട് ഡോസുകൾ എടുത്ത ആളുകളിൽ നിന്ന് ബൂസ്റ്റർ ഡോസിന്റെ ആവശ്യം അനുദിനം വർദ്ധിച്ചുകൊണ്ടിരിക്കുകയാണെന്നും അപേക്ഷയിലുണ്ട്. ഈ സാഹചര്യത്തിൽ സ്വയം പരിരക്ഷിക്കുന്നതിന് മൂന്നാം ഡോസ് അഥവാ ബൂസ്റ്റർ ഡോസ് നഷ്ടപ്പെടുത്തരുത് എന്നത് കാലഘട്ടത്തിന്റെ ആവശ്യവും ഓരോ വ്യക്തിയുടെയും ആരോഗ്യത്തിനുള്ള അവകാശത്തിന്റെ കാര്യവുമാണ് പ്രകാശ് കുമാർ സിംഗ് പറഞ്ഞു.
പ്രതിരോധ കുത്തിവയ്പ്പിനെക്കുറിച്ചുള്ള ദേശീയ സാങ്കേതിക ഉപദേശക ഗ്രൂപ്പും കൊറോണ വാക്സിൻ അഡ്മിനിസ്ട്രേഷനെക്കുറിച്ചുള്ള ദേശീയ വിദഗ്ധ ഗ്രൂപ്പും ബൂസ്റ്റർ ഡോസിന്റെ ആവശ്യകതയ്ക്കും ന്യായീകരണത്തിനും ശാസ്ത്രീയ തെളിവുകൾ ആലോചിക്കുകയും പരിഗണിക്കുകയും ചെയ്യുന്നുവെന്ന് കേന്ദ്ര സർക്കാർ പാർലമെന്റിനെ അറിയിച്ചു. അടുത്തിടെ, കേരളം, രാജസ്ഥാൻ, കർണാടക, ഛത്തീസ്ഗഢ് എന്നിവ പുതിയ വകഭേദമായ ‘ഒമിക്രോൺ ഉയർത്തിയ ആശങ്കകൾക്കിടയിൽ ബൂസ്റ്റർ ഡോസ് അനുവദിക്കുന്നതിനെക്കുറിച്ച് തീരുമാനിക്കാൻ കേന്ദ്രത്തോട് ആവശ്യപ്പെട്ടിരുന്നു. കൊറോണ വൈറസിനെതിരെ പൂർണ്ണമായി വാക്സിനേഷൻ എടുത്തവർക്ക് ബൂസ്റ്റർ ഡോസ് നൽകുന്നതിനെക്കുറിച്ചുള്ള നിലപാട് വ്യക്തമാക്കാൻ നവംബർ 25ന് ദില്ലി ഹൈക്കോടതി കേന്ദ്രത്തോട് നിർദ്ദേശിച്ചു.
