ന്യൂഡല്‍ഹി: തീവ്രവാദ പ്രവര്‍ത്തനങ്ങളെ അമര്‍ച്ചചെയ്യാന്‍ ഇന്ത്യന്‍ സേന താഴ്‌വരയില്‍ നടത്തുന്ന പ്രവര്‍ത്തനങ്ങളെ പ്രശംസിച്ച് മുതിര്‍ന്ന കോണ്‍ഗ്രസ് നേതാവും മന്ത്രിയുമായിരുന്ന ഗുലാംനബി ആസാദ്. ഇന്ത്യന്‍ സേന നടത്തുന്ന പ്രവര്‍ത്തനങ്ങളെ പ്രകീര്‍ത്തിച്ച അദ്ദേഹം സേന നടത്തുന്ന തീവ്രവാദവിരുദ്ധ പ്രവര്‍ത്തനത്തിനിടെ നാശനഷ്ടങ്ങള്‍ ഉണ്ടാവുന്നത് ഒഴിവാക്കണമെന്നും അത് തീവ്രവാദത്തിന് ഇന്ധനം പകരുമെന്നും മുന്നറിയിപ്പുനല്‍കി.
താഴ്‌വരയിലെ ജനങ്ങളുമായി പൂര്‍ണമായി സഹകരിച്ചുകൊണ്ടാണ് സേനാനീക്കം. തീവ്രവാദികളല്ലാത്തവരും സാധരണക്കാരും കൊല്ലപ്പെടാതിരിക്കാന്‍ ജാഗ്രതപുലര്‍ത്തണമെന്നും അദ്ദേഹം പറഞ്ഞു. അത്തരത്തില്‍ സംഭവം ഉണ്ടായാല്‍ അത് തീവ്രവാദികള്‍ക്ക് ഇന്ധനം പകരുമെന്നും അദ്ദേഹം ചൂണ്ടിക്കാട്ടി.
ഹൈദര്‍പോറ വെടിവയ്പില്‍ സാധാരണക്കാര്‍ കൊലചെയ്യപ്പെട്ടുവെന്ന് ആരോപിച്ച് പിഡിപി നേതാവ് മെഹബൂബ മുഫ്തിയും നാഷണല്‍ കോണ്‍ഫെറന്‍സ് നേതാവ് ഒമര്‍ അബ്ദുള്ളയും പ്രതിഷേധവുമായി എത്തിയ സാഹചര്യത്തില്‍ ഗുലാംനബി ആസാദിന്റെ പരാമര്‍ശം രാഷ്‌ട്രീയ പ്രാധാന്യം നേടിയിരിക്കുകയാണ്. റജൗരിയില്‍ ഒരുറാലിയെ അഭിസംബോധന ചെയ്യുകയായിരുന്നു അദ്ദേഹം.
ഹൈദര്‍പോറയില്‍ പോലീസ് വെടിവെയ്പില്‍ രണ്ട് കലാപകാരികും അവരുടെ രണ്ട് സഹായികളും കഴിഞ്ഞമാസം കൊലചെയ്യപ്പെട്ടിരുന്നു. ശ്രീനഗറിലെ പ്രധാനനഗരമായ ഹൈദര്‍പോറയിലെ ഒരുവ്യാപാരകേന്ദ്രത്തില്‍ കലാപകാരികള്‍ എത്തിയതായി രഹസ്യവിവരം ലഭിച്ചതിനെ തുടര്‍ന്നു നടത്തിയ വെടിവയ്പിലാണ് ഇവര്‍ കൊല്ലപ്പെട്ടത്. വ്യാപാരിയായ അല്‍ത്താഫ് അഹമ്മദ് ബട്ടും മുദാസിര്‍ ഗൗള്‍ എന്ന ദന്തഡോക്ടറുമാണ് കൊല്ലെപ്പെട്ടത്. ഇവര്‍ കാലാപകാരികള്‍ക്ക് സാഹയം ചെയ്തുകൊടുത്തവരാണെന്ന് പൊലീസ് വ്യക്തമാക്കിയിരുന്നു. തീവ്രവാദികള്‍ക്ക് ഒളിച്ചുതാമസിക്കാന്‍ ഇടംനല്‍കിയവരാണ് പൊലീസും തീവ്രവാദികളും തമ്മിലുള്ള ഏറ്റുമുട്ടലില്‍ കൊലചെയ്യപ്പെട്ടത്. തീവ്രവാദിആക്രമത്തില്‍ തിരിച്ചുവെടിവയ്‌ക്കുന്നതിനിടെയാണ് ഇവര്‍ കൊലചെയ്യപ്പെട്ടതെന്നാണ് പൊലീസ് നല്‍കിയ വിശദീകരണം.
തീവ്രവാദികളെ സഹായിച്ചവര്‍ കൊലചെയ്യപ്പെട്ട സംഭവത്തിലാണ് മെഹ്ബൂബ മുഫ്ത്തിയും ഒമര്‍ അബ്ദുള്ളയും പ്രതിഷേധവുമായി രംഗത്ത് എത്തിയത്. തീവ്രവാദവിരുദ്ധ പ്രവര്‍ത്തനത്തില്‍ ഉണ്ടാവുന്ന നാശനഷ്ടങ്ങള്‍ തീവ്രവാദത്തിന് ഇന്ധനം പകരാന്‍ ഇടവരുത്തുമെന്ന ഗുലാംനബി ആസാദിന്റെ വാക്കുകള്‍ തീവ്രവാദത്തെ വെള്ളപൂശുന്ന ഈ നേതാക്കളുടെ നിലപാടിനെതിരെയുള്ള പരോക്ഷമായി വിമര്‍ശനമെന്നാണ് വിലയിരുത്തുന്നത്.
