ന്യൂഡൽഹി:കുട്ടികൾക്ക് ജാവലിൻ ത്രോയുടെ ബാലപാഠങ്ങൾ പകർന്ന് കൊടുത്ത് ഒളിമ്പിക്‌സ് സ്വർണമെഡൽ ജേതാവ് നീരജ് ചോപ്ര.അഹമ്മദാബാദിലെ സസ്‌കർധാം സ്‌കൂളിലെ പരിപാടിക്കെത്തിയ കുട്ടികൾക്കാണ് താരം പരിശീലനം നൽകിയത്.ഇന്ത്യയുടെ ഭാവി ചാമ്പ്യൻമാരെ നീരജ് പരിശീലിപ്പിച്ചതിന്റെ ചിത്രങ്ങൾ പ്രധാനമന്ത്രി നരേന്ദ്ര മോദി ട്വീറ്റ് ചെയ്തു.
വിദ്യാർത്ഥികളോടൊപ്പം സമയം ചിലവഴിച്ചതിലും കായികക്ഷമത വർദ്ധിപ്പിക്കാൻ കുട്ടികളെ പ്രചോദിപ്പിച്ചതിനും താരത്തെ അഭിന്ദിച്ചുകൊണ്ടാണ് പ്രധാനമന്ത്രിയുടെ ട്വീറ്റ്. അഹമ്മദാബാദിലെ സ്‌കൂളിൽ എത്തിയ താരം കുട്ടികളോടൊപ്പം ജാവ്ലിൻത്രോ, വോളിബോൾ,അമ്പെയ്‌ത്ത് എന്നിവയുൾപ്പടെയുള്ള കായിക ഇനങ്ങൾ കളിക്കുകയും അവർക്ക് അതിന്റെ ബാലപാഠങ്ങൾ പകർന്നുകൊടുക്കുകയും ചെയ്തു.ഫിറ്റ്‌നെസിൽ വ്യായാമത്തിന്റെയും ഭക്ഷണക്രമത്തിന്റെയും പ്രാധാന്യത്തെക്കുറിച്ചും അദ്ദേഹം വിദ്യാർത്ഥികളോട് സംവദിച്ചു.
അതിൽ ഇന്ത്യയുടെ സ്വർണതാരം ചെറിയ ഒരു കുട്ടിയെ ജാവ്ലിൻ എറിയാൻ പരിശീലിപ്പിക്കുന്ന വീഡിയോ ഇപ്പോൾ വൈറലാണ്. മികച്ച നിമിഷങ്ങൾ എന്നാണ് പ്രധാനമന്ത്രി നരേന്ദ്രമോദി നീരജിന്റെ പരിശീലകനായുള്ള ഈ പ്രകടനത്തെ വിലയിരുത്തിയത്.
സന്തുലിത ആഹാര ക്രമത്തിന്റെ പ്രാധാന്യത്തെക്കുറിച്ചും ശാരീരികക്ഷമത നിലനിർത്തുന്നതിനെക്കുറിച്ചും കായിക മത്സരങ്ങളുടെ പ്രാധാന്യത്തെക്കുറിച്ചുമെല്ലാം കായിക താരങ്ങൾ സ്‌കൂൾ വിദ്യാർത്ഥികളുമായി സംവദിക്കുകയും ബോധവൽക്കരണം നടത്തുകയും വേണമെന്ന പ്രധാനമന്ത്രി നരേന്ദ്ര മോദിയുടെ ആഹ്വാനമനുസരിച്ചാണ് നീരജ് പരിപാടിക്കെത്തിയത്.അഹമ്മദാബാദിലെ 75 സ്‌കൂളിൽ നിന്നും തെരഞ്ഞെടുക്കപ്പട്ട കുട്ടികളുമായാണ് നീരജ് ചോപ്ര സംവദിച്ചത്.
സ്വാതന്ത്ര്യത്തിന്റെ 75-ാം വാർഷികവുമായി ബന്ധപ്പെട്ട് നടന്ന ആസാദി കി അമൃത് മഹോത്സവ് ചടങ്ങിൽ പങ്കെടുക്കവെയാണ് ഒളിമ്പിക്‌സ് താരങ്ങളും പാരാലിംപിക് താരങ്ങളും സ്‌കൂൾ വിദ്യാർഥികളുമായി സംവദിക്കേണ്ടതിന്റെ പ്രാധാന്യത്തെക്കുറിച്ച് പ്രധാനമന്ത്രി നരേന്ദ്ര മോദി ചൂണ്ടിക്കാട്ടിയത്
കുട്ടികളുടെ ചോദ്യങ്ങൾക്കെല്ലാം ഉത്തരം നൽകിയ നീരജ് ചോപ്ര ഇഷ്ടഭക്ഷണമേതെന്ന ചോദ്യത്തിനും മറുപടി നൽകി. വെജിറ്റബിൾ ബിരിയാണ് ആണ് തന്റെ ഇഷ്ടഭക്ഷണമെന്നും വെജിറ്റബിൾ ബിരിയാണി ഉണ്ടാക്കാൻ ഇഷ്ടമാണെന്നും നീരജ് പറഞ്ഞു. അധികം മസാല ചേർക്കാതെ തയാറാക്കുന്ന വെജിറ്റബിൾ ബിരിയാണി തൈര് കൂട്ടി കഴിക്കുന്നത് ഉത്തമമാണെന്നും നീരജ് പറഞ്ഞു.
ആരോഗ്യകരമായ ഭക്ഷണമാണെന്നതിന് പുറമെ പച്ചക്കറികളുടെയും കാർബോ ഹൈഡ്രേറ്റിന്റേയും ശരിയായ മിശ്രണമാണ് വെജിറ്റബിൾ ബിരിയാണി എന്നും നീരജ് വ്യക്തമാക്കി. പാചകം ചെയ്യുന്നത് പരിശീലനത്തിന്റെ കാഠിന്യത്തിൽ നിന്നും മാനസിക സമ്മർദ്ദങ്ങളിൽ നിന്നും മാറി നിൽക്കാൻ സഹായിക്കുന്നുണ്ടെന്നും നീരജ് പറഞ്ഞു.
