മുംബൈ: ന്യൂസിലാന്റിനെതിരെ ടെസ്റ്റ് ക്രിക്കറ്റ് പരമ്പര നേട്ടത്തിനെ വാനോളം പുകഴ്‌ത്തി മുൻ പരിശീലകൻ രവിശാസ്ത്രി. ടെസ്റ്റ് ക്രിക്കറ്റിൽ ടീം ഇന്ത്യയെ വീണ്ടും ഒന്നാം സ്ഥാനത്ത് പ്രതിഷ്ഠിച്ച നായകനായി വിരാട് കോഹ് ലി മാറിയെന്നും ടെസ്റ്റ് ക്രിക്കറ്റിന്റെ യഥാർത്ഥ ആരാധകനാണ് വിരാടെന്നും രവിശാസ്ത്രി പറഞ്ഞു.
കഴിഞ്ഞ ഒരു ദശകമായി ടെസ്റ്റ് ക്രിക്കറ്റിൽ ടീം ഇന്ത്യയുടെ മേധാവിത്വത്തിൽ വിരാട് കോഹ് ലിയുടെ പങ്ക് വളരെ വലുതാണ്. സമ്പൂർണ്ണ സമർപ്പണമാണ് ടെസ്റ്റ് ക്രിക്കറ്റിനായി വിരാട് നടത്തുന്നത്. ടീം ഇന്ത്യയുടെ എക്കാലത്തേയും കരുത്ത് ടെസ്റ്റ് ക്രിക്കറ്റാണെന്ന് നാം തിരിച്ചറിയണം. എല്ലാ താരങ്ങളും അവരുടെ പ്രതിഭ തെളിയിക്കാൻ ടെസ്റ്റ് ക്രിക്കറ്റിൽ ആത്മാർത്ഥ ശ്രമം നടത്തണമെന്നും രവിശാസ്ത്രി പറഞ്ഞു.
ടീം ഇന്ത്യയുടെ താരങ്ങൾ ഇന്ന് ലോകക്രിക്കറ്റിൽ അത്ഭുതമാണ്. ഏറ്റവും അധികം ഏകദിനങ്ങളും അതുപോലെ ഐ.പി.എല്ലും കളിക്കുന്നവരാണ് അവർ. എന്നാൽ അതേ താരങ്ങൾ ടെസ്റ്റിലും അസാമാന്യമായ പ്രകടനം നടത്തുന്നത് അതിശയ ത്തോടെയാണ് മറ്റ് രാജ്യങ്ങൾ വീക്ഷിക്കുന്നതെന്നും രവിശാസ്ത്രി വിലയിരുത്തി.
