തിരുവനന്തപുരം: സംസ്ഥാനത്തെ പ്ലസ് വൺ സീറ്റ് ക്ഷാമത്തിന് പരിഹാരവുമായി സർക്കാർ ഉത്തരവ്. 79 അധിക പ്ലസ് വൺ ബാച്ചുകൾ അനുവദിച്ച് സർക്കാർ ഉത്തരവിറക്കി. 71 അധിക ബാച്ചുകൾ അനുവദിക്കുമെന്നാണ് തീരുമാനിച്ചിരുന്നത്. എന്നാൽ ഈ തീരുമാനമാണ് മാറ്റി സീറ്റുകളുടെ എണ്ണം വർദ്ധിപ്പിച്ചത്.
സയൻസിൽ 20 ബാച്ച് അധികം അനുവദിച്ചിട്ടുണ്ട്. അർഹത നേടിയ എല്ലാ വിദ്യാർത്ഥികൾക്കും പ്രവേശനം ഉറപ്പെന്ന് വിദ്യാഭ്യാസ മന്ത്രി വി ശിവൻകുട്ടി അറിയിച്ചു. സീറ്റ് അനുവദിച്ച സ്കൂളുകളുടെ പട്ടിക ഉടൻ പുറത്തിറക്കുമെന്നും മന്ത്രി പറഞ്ഞു.
അതേസമയം, ഒന്നാം വർഷ ഹയർസെക്കൻഡറി/വിഎച്ച്എസ്ഇ ഇംപ്രൂവ്മെന്റ് പരീക്ഷകൾക്ക് സർക്കാർ അനുമതി നൽകി. കൊറോണ വ്യാപനത്തിന്റെ പശ്ചാത്തലത്തിൽ ഇത്തവണ പരീക്ഷ ഉണ്ടായിരിക്കില്ലെന്ന് ഒന്നാം വർഷ പരീക്ഷ വിജ്ഞാപനത്തിൽ ഹയർസെക്കൻഡറി വിഭാഗം നേരത്തെ അറിയിച്ചിരുന്നു.
എന്നാൽ, കൊറോണ ഉൾപ്പെടെയുള്ള കാരണങ്ങളാൽ 5,000ത്തോളം വിദ്യാർത്ഥികൾക്ക് ഒക്ടോബറിൽ പരീക്ഷ എഴുതാൻ സാധിച്ചിരുന്നില്ല. ഇതിനെതിരെ പരാതികൾ ഉയർന്നിരുന്നു. ഈ പശ്ചാത്തലത്തിലാണ് ഇംപ്രൂവ്മെന്റ് പരീക്ഷകൾക്ക് അനുമതി നൽകി സർക്കാർ ഉത്തരവിറക്കിയത്.
