ഏതാനും നാളുകളായി സമൂഹമാദ്ധ്യമങ്ങളിൽ തരംഗമാണ് ബോളിവുഡ് താരജോഡികളായ കത്രീന കൈഫിന്റെയും വിക്കി കൗശലിന്റെയും വിവാഹം. എത്ര വർണിച്ചാലും തീരാത്ത വിവാഹ വിശേഷങ്ങളാണ് ‘വിക്ക്-ട്രീന’ ആരാധകർക്ക് ദിവസവും പങ്കുവെക്കാനുള്ളത്. വിവാഹ ദിനത്തിൽ പ്രത്യക്ഷപ്പെട്ട കേക്കും കത്രീനയണിഞ്ഞ മോതിരവുമൊക്കെയാണ് ഇപ്പോഴത്തെ ചർച്ച. എന്താണ് വിക്കി-കത്രീന വിവാഹ ചടങ്ങിലെ കേക്കിന്റെ പ്രത്യേകത..
മധുരപ്രിയയാണ് കത്രീനയെന്ന് ആരാധകർക്കെല്ലാവർക്കുമറിയാം. ഡിസേർട്ടുകളോടും മധുരപലഹാരങ്ങളോടുമുള്ള തന്റെ ഇഷ്ടം താരം പലപ്പോഴായി പങ്കുവെച്ചിട്ടുണ്ട്. അതുകൊണ്ട് തന്നെ കത്രീനയുടെ ആവശ്യപ്രകാരം നിർമിച്ചെടുത്തതാണ് വിവാഹ കേക്കും. കത്രീന നിർദേശിച്ച വിധം എല്ലാവിധ പ്രത്യേകതകളും ഉൾപ്പെടുത്തിയ വെഡ്ഡിങ് കേക്ക്.
അഞ്ചുനിലയിൽ അതിമനോഹരമായി രൂപകൽപന ചെയ്ത കേക്കായിരുന്നു വിക്ക്ട്രീന വിവാഹത്തിന് ഉണ്ടായിരുന്നത്. 48 മണിക്കൂർ കൊണ്ട് നിർമാണം പൂർത്തിയാക്കിയ കേക്കാണെന്ന പ്രത്യേകതയും അതിനുണ്ട്. ഏകദേശം നാല് ലക്ഷം രൂപ ചിലവിൽ കേക്ക്-ബേക്കറായ മീര ജുൻജുൻവാലയാണ് നിർമിച്ചിരിക്കുന്നത്. 12 കിലോയോളം തൂക്കം വരുന്ന കേക്കിൽ വിദേശത്ത് നിന്നും പ്രത്യേകം ഇറക്കുമതി ചെയ്ത പഴങ്ങൾ ഉപയോഗിച്ച് അലങ്കരിച്ചു. കാരമൽ പാറ്റിസ്സെറിയെന്ന സംരഭകരാണ് കേക്കിന് പിന്നിൽ.
കേക്ക് പോലെ തന്നെ ഏറെ ചർച്ച ചെയ്യപ്പെട്ട ഒന്നാണ് കത്രീനയുടെ വിവാഹ മോതിരവും. അതിമനോഹരമായ വജ്രമോതിരമാണ് കത്രീനയുടെ വിരലുകളിൽ വിക്കി അണിഞ്ഞത്. ഏകദേശം 7.4 ലക്ഷം രൂപയോളം വിലമതിക്കുന്ന വജ്ര മോതിരത്തിൽ ഇന്ദ്രനീലവും പതിച്ചിട്ടുണ്ട്. അതേസമയം പ്ലാറ്റിനത്തിൽ നിർമിച്ച ടിഫാനി ക്ലാസിക്ക് മോതിരമാണ് വിക്കിയുടെ വിരലുകളിൽ കത്രീന അണിയിച്ചത്.
2021ൽ ബോളിവുഡ് സിനിമാ പ്രേമികൾ ഏറെ കാത്തിരുന്ന വിവാഹമാണ് കത്രീന-വിക്കി ജോഡികളുടേത്. മൂന്ന് ദിവസങ്ങളിലായി അത്യധികം ആർഭാഢമായാണ് വിവാഹം നടന്നത്. കർശന നിയന്ത്രണങ്ങളോടെ ഡിസംബർ 9നായിരുന്നു വിവാഹം. പ്രത്യേകം ക്ഷണിക്കപ്പെട്ട 120 പേരടങ്ങുന്ന വിവാഹ ചടങ്ങ് രാജസ്ഥാനിലെ ആഡംബര റിസോർട്ടിലായിരുന്നു നടന്നത്. താരങ്ങൾ ഇൻസ്റ്റഗ്രാമിലൂടെ പങ്കുവെച്ച ചുരുക്കം ചില വിവാഹ ചിത്രങ്ങൾ മാത്രമേ ഇതുവരെ ആരാധകർക്ക് ലഭിച്ചിട്ടുള്ളൂ. കൂടുതൽ ദൃശ്യങ്ങൾ സീരീസ് രൂപത്തിൽ ഒടിടി പ്ലാറ്റ്ഫോമിലൂടെ പ്രദർശിപ്പിക്കുമെന്നാണ് റിപ്പോർട്ടുകൾ.
