തമിഴകത്തിന്റെ ദളപതിക്ക് ജന്മദിനാശംസകൾ നേരാൻ വീടിന് മുന്നിൽ ആരാധകപ്രവാഹം

ചെന്നൈ: തമിഴകത്തിന്റെ സ്‌റ്റൈൽ മന്നൻ രജനീകാന്തിന് ഇന്ന് 71-ാം പിറന്നാൾ. ആരോഗ്യ പ്രശ്‌നങ്ങൾ നേരിട്ട് ദിവസങ്ങളോളം ആശുപത്രിയിൽ തുടർന്ന താരത്തിന്റെ ആയുരാരോഗ്യത്തിനായി പ്രാർത്ഥിക്കാനും അദ്ദേഹത്തെ കണ്ട് ആശംസകൾ നേരാനും വൻ ജനസന്നാഹമാണ് രജനിയുടെ വസതിയ്‌ക്ക് മുന്നിൽ.

1950 ഡിസംബർ 12ന് ബെംഗളൂരുവിലാണ് രജനിയുടെ ജനനം. അന്നത് മൈസൂർ സംസ്ഥാനത്തിന് കീഴിലുള്ള ബാംഗ്ലൂരായിരുന്നു. ഇന്ന് കർണാടക സംസ്ഥാനത്തിന്റെ തലസ്ഥാനമായ ബെംഗളൂരു. അദ്ദേഹത്തിന്റെ യഥാർഥ പേര് ശിവാജി റാവു ഗെയ്‌ക്ക്വാദ് എന്നായിരുന്നു. സിനിമയിലെത്തിയ ശേഷമാണ് രജനികാന്ത് എന്ന പേര് സ്വീകരിച്ചത്. കർണാടക ട്രാൻസ്‌പോർട്ട് കോർപറേഷനിൽ കണ്ടക്ടറായി ജോലി ചെയ്തിരുന്ന രജനി 1975ൽ കെ. ബാലചന്ദർ സംവിധാനം ചെയ്ത അപൂർവ രാഗങ്ങൾ എന്ന ചിത്രത്തിലൂടെയാണ് സിനിമയിൽ കാലെടുത്തു വച്ചത്.

എഴുപതുകളുടെ അവസാന ഘട്ടത്തിൽ കമലഹാസൻ നായകനായ ചിത്രങ്ങളിൽ വില്ലൻ വേഷമായിരുന്നു രജനിക്ക് ലഭിച്ചിരുന്നത്. 1978ൽ ജെ. മഹേന്ദ്രൻ സംവിധാനം ചെയ്ത മുള്ളും മലരും എന്ന തമിഴ് സിനിമയിൽ ശ്രദ്ധേയമായ കഥാപാത്രത്തെ അവതരിപ്പിച്ചു. പിന്നീട് നിരവധി ചിത്രങ്ങളിൽ പ്രധാന വേഷങ്ങളിൽ രജനികാന്ത് അഭിനയിക്കാൻ തുടങ്ങി. 1980കളാണ് രജനിയുടെ അഭിനയ ജീവിതത്തിലെ സംഭവബഹുലമായ കാലഘട്ടം. അക്കാലത്ത് അദ്ദേഹം അഭിനയം നിർത്തുന്നു എന്ന തരത്തിലുള്ള അഭ്യൂഹങ്ങൾ പ്രചരിച്ചിരുന്നു. എന്നാൽ ആ സമയത്ത് പുറത്തിറങ്ങിയ ബില്ല എന്ന ചിത്രം ബോക്സ് ഓഫീസിൽ വൻ ഹിറ്റായി.

പിന്നീട് രജനിയുടെ ഹിറ്റ് ചിത്രങ്ങൾ ഒന്നിനു പുറകെ ഒന്നായി പുറത്തിറങ്ങി. മുരട്ടുകാളൈ, പോക്കിരി രാജ, താനിക്കാട്ടു രാജ, നാൻ മഹാൻ അല്ലൈ, മൂണ്രു മുഗം തുടങ്ങിയ ചിത്രങ്ങൾ ബോക്സ് ഓഫീസിൽ തരംഗം സൃഷ്ടിച്ചു. തമിഴിനു പുറമെ തെലുങ്ക്, കന്നട, മലയാളം, ഹിന്ദി, ബംഗാളി ചിത്രങ്ങളിൽ രജനി അഭിനയിച്ചിട്ടുണ്ട്.

അക്ഷൻ രംഗങ്ങളിലെ ചടുലതയും പാട്ടു സീനുകളിലെ വേറിട്ട ശൈലിയും രജനീകാന്തിന്റെ പ്രത്യേകതകളാണ്. തൊണ്ണൂറുകളിൽ മന്നൻ, മുത്തു, ബാഷ, പടയപ്പ തുടങ്ങിയ ചിത്രങ്ങൾ ആരാധകർക്ക് ഉത്സവമായി.

നിരവധി പുരസ്‌കാരങ്ങൾ അദ്ദേഹത്തെ തേടി എത്തിയിട്ടുണ്ട്. 2000ത്തിൽ പത്മഭൂഷണും, 2016ൽ പത്മവിഭൂഷണും നൽകി രാജ്യം ആദരിച്ചു. കൂടാതെ ഈ വർഷം ഇന്ത്യൻ സിനിമയിലെ പരമോന്നത പുരസ്‌കാരമായ ദാദാ സാഹേബ് ഫാൽക്കെ പുരസ്‌കാരം നൽകി ഇന്ത്യൻ സിനിമ അദ്ദേഹത്തെ ആദരിച്ചു. ദക്ഷിണേഷ്യയിലെ ഏറ്റവും സ്വാധീനമുള്ള വ്യക്തികളിലൊരാളായി ഏഷ്യാവീക്ക് മാസികയും ഇന്ത്യയിലെ ഏറ്റവും സ്വാധീനമുള്ള വ്യക്തിയായി ഫോബ്സ് ഇന്ത്യ മാസികയും രജനീകാന്തിനെ തിരഞ്ഞെടുത്തിട്ടുണ്ട്.