ന്യൂഡൽഹി: ഉപഭോക്താക്കൾക്ക് കനത്ത വെല്ലുവിളിയുയർത്തി ആമസോൺ പ്രൈം നിരക്കുകൾ വർദ്ധിപ്പിച്ചു. പുതുക്കിയ നിരക്ക് തിങ്കളാഴ്ച മുതൽ പ്രാബല്യത്തിലായി. 999 രൂപയുടെ വാർഷിക നിരക്ക് ഇനി മുതൽ 1,499 രൂപയ്ക്കാണ് ലഭിക്കുക.
നിരക്കുകൾ പുതുക്കിയത് വിവിധ പാക്കേജുകൾക്കും ബാധകമാണ്. പ്രതിമാസ പാക്കേജ് എടുക്കുന്നവർക്ക് ഇനിമുതൽ 179 രൂപ നൽകേണ്ടി വരും. 50രൂപയാണ് പ്രതിമാസ നിരക്കിന് വർദ്ധിപ്പിച്ചത്. ത്രിമാസ പാക്കേജ് 329 രൂപയിൽ നിന്നും 459 ആയി ഉയർന്നിട്ടുണ്ട്.
കഴിഞ്ഞ അഞ്ച് വർഷമായി ആമസോൺ പ്രൈം അംഗത്വ നിരക്കുകളിൽ വ്യത്യാസം വരുത്തിയിട്ടില്ലായിരുന്നു. എന്തുകൊണ്ടാണ് നിരക്കുകൾ ഉയർത്താനുള്ള തീരുമാനം പൊടുന്നനെ ഉണ്ടായതെന്നും ആമസോൺ വ്യക്തമാക്കിയിട്ടില്ല. കൊറോണ കാലത്തിന് ശേഷം നിരവധി പേർ ഒടിടി പ്ലാറ്റ്ഫോമുകൾ ഉപയോഗിക്കാൻ തുടങ്ങിയത് ആമസോണിനും ഏറെ പ്രയോജനപ്പെട്ടിരുന്നു. മലയാളം ഉൾപ്പടെയുള്ള സിനിമകൾ പ്രൈമിൽ റിലീസ് ആരംഭിച്ചു. ഇതോടെ അതുവരെ അംഗത്വമെടുക്കാതിരുന്നവർ പോലും ആമസോണിന്റെ ഭാഗമായി തുടങ്ങി.
ഇതിനിടെ 18നും 24 വയസിനും ഇടയിൽ പ്രായമുള്ളവർക്ക് പ്രത്യേക ഓഫറും ആമസോൺ ഒരുക്കിയിരുന്നു. പ്രായം തെളിയിക്കുന്ന രേഖകൾ ഹാജരാക്കിയാൽ വാർഷിക അംഗത്വനിരക്കായിരുന്ന 999 രൂപയ്ക്ക് പകരം 499 രൂപയ്ക്ക് അംഗത്വം ലഭിച്ചിരുന്നു. നിലവിൽ വാർഷിക നിരക്ക് 1,499 ആക്കിയ പശ്ചാത്തലത്തിൽ ഓഫർ തുടരുമോയെന്ന കാര്യം കമ്പനി വ്യക്തമാക്കിയിട്ടില്ല.
അതേസമയം വർദ്ധനവ് പ്രാബല്യത്തിൽ വരുന്നതിന് മുമ്പ് അംഗത്വമെടുത്തവർക്ക് കാലാവധി കഴിയുന്നത് വരെ നിരക്കിൽ മാറ്റമുണ്ടാകില്ല. കാലാവധി പൂർത്തിയായി പാക്കേജ് പുതുക്കുന്ന വേളയിൽ നിരക്ക് വർദ്ധന ബാധകമാകുമെന്നും ആമസോൺ വ്യക്തമാക്കിയിട്ടുണ്ട്. പ്രൈം മെമ്പർഷിപ്പ് എടുത്തവർക്ക് ലഭിക്കുന്ന ഫാസ്റ്റ് ഡെലിവറി, സൗജന്യ ഡെലിവറി സേവനങ്ങൾ തുടരുന്നതാണ്.
Comments