ന്യൂഡൽഹി: അഗതി മന്ദിരത്തിലെ ഹിന്ദു പെൺകുട്ടികളെ നിർബന്ധിത മതപരിവർത്തനത്തിന് വിധേയമാക്കിയെന്ന പരാതിയിൽ ക്രിസ്ത്യൻ മിഷനറീസ് ഓഫ് ചാരിറ്റിയ്‌ക്കെതിരെ കേസ്. വഡോദര മകർപ്പുരയിൽ മദർ തെരേസ സ്ഥാപിച്ച ക്രിസ്ത്യൻ മിഷനറീസ് ചാരിറ്റിയെന്ന സ്ഥാപനത്തിനെതിരെയാണ് കേസെടുത്തത്. ഗുജറാത്ത് പോലീസിന്റേതാണ് നടപടി.
മിഷനറീസ് ഓഫ് ചാരിറ്റിയിൽ താമസിക്കുന്ന ഹിന്ദുക്കൾ അടക്കം മറ്റ് മതക്കാരായ പെൺകുട്ടികളെ നിർബന്ധിച്ച് ക്രിസ്ത്യൻ മതഗ്രന്ഥങ്ങൾ വായിക്കാൻ നിർബന്ധിക്കുകയും മതപരിവർത്തനം നടത്തുന്നുവെന്നുമാണ് പരാതിയിൽ പറഞ്ഞത്. ഈ വർഷം ഫെബ്രുവരി 10നും ഡിസംബർ ഒൻപതിനുമിടയിലാണ് ഇവരെ മതപരിവർത്തനത്തിന് ഇരയാക്കിയത്.
ജില്ലാ സാമൂഹിക സുരക്ഷാ ഓഫീസർ മായങ്ക് ത്രിവേദി കഴിഞ്ഞ ആഴ്‌ച്ച ജില്ലാ ശിശുക്ഷേമ സമിതി ചെയർമാനൊപ്പം അഗതിമന്ദിരത്തിൽ സന്ദർശനം നടത്തിയിരുന്നു. തുടർന്ന് അദ്ദേഹം സ്ഥാപനത്തിനെതിരെ ജില്ലാ കളക്ടർക്ക് പരാതി നൽകുകയായിരുന്നു. ഇത് പോലീസിന് കൈമാറുകയും എഫ്‌ഐആർ രജിസ്റ്റർ ചെയ്ത് കേസെടുക്കുകയും ചെയ്തു. ഇവിടെ നടത്തിയ പരിശോധനയിൽ 20ഓളം ബൈബിളിന്റെ കോപ്പികളും കണ്ടെത്തിയിട്ടുണ്ട്.
മതവികാരം വ്രണപ്പെടുത്തൽ, നിർബന്ധിച്ച് മതപരിവർത്തനം നടത്തൽ തുടങ്ങിയ വകുപ്പുകൾ ചുമത്തിയാണ് മിഷനറീസ് ഓഫ് ചാരിറ്റിയ്‌ക്കെതിരെ പോലീസ് കേസെടുത്തിരിക്കുന്നത്. മതപരിവർത്തനത്തിന് പുറമെ ഇവിടെ താമസിക്കുന്ന യുവതികളെ ക്രിസ്ത്യന് ആചാരപ്രകാരം വിവാഹം കഴിപ്പിക്കുന്നുവെന്നും പരാതി ലഭിച്ചിട്ടുണ്ടെന്ന് ഗുജറാത്ത് പോലീസ് അറിയിച്ചു.
പ്രാഥമിക അന്വേഷണത്തിൽ മതംമാറൽ സംബന്ധിച്ച് ഇവിടെ താമസിക്കുന്ന ഒരു പെൺകുട്ടി മൊഴി നൽകിയിട്ടുണ്ട്. സംഭവത്തിൽ അന്വേഷണം നടത്തുമെന്ന് പോലീസ് അറിയിച്ചു. അതേസമയം അഗതിമന്ദിരത്തിനെതിരെയുള്ള ആരോപണം സ്ഥാപന മേധാവി സിസ്റ്റർ റോസ് തെരേസ നിഷേധിച്ചു. ബാലവേലയിൽ നിന്നും രക്ഷപെടുത്തിയ പെൺകുട്ടികളാണ് ഇവിടെയുള്ളതെന്ന് അവർ അറിയിച്ചു.
