പ്യൂർട്ടോറിക്കോ: നിരവധി മത്സരാർത്ഥികൾ കൊറോണ പോസിറ്റീവ് ആയതിനെതുടർന്ന് പ്യൂർട്ടോ റിക്കോയിൽ നടത്താൻ നിശ്ചയിച്ചിരുന്ന മിസ്സ് വേൾഡ് 2021 സൗന്ദര്യമത്സരം ‘താൽക്കാലികമായി’ മാറ്റിവച്ചു. മത്സരത്തിൽ ഇന്ത്യയെ പ്രതിനിധീകരിക്കുന്ന മാനസ വാരണാസി ഉൾപ്പെടെയുളള മത്സരാർത്ഥികൾക്കാണ് കൊറൊണ സ്ഥിരീകരിച്ചതെന്ന് മിസ് ഇന്ത്യ ഓർഗനൈസേഷൻ അറിയിച്ചു.
മത്സരാർത്ഥികൾ, ജീവനക്കാർ, ജോലിക്കാർ, പൊതുജനങ്ങൾ എന്നിവരുടെ ആരോഗ്യ-സുരക്ഷാ താൽപ്പര്യം കണക്കിലെടുത്ത്’ മത്സരം മാറ്റിവച്ചതായും അടുത്ത 90 ദിവസത്തിനുള്ളിൽ ഇത് നടക്കുമെന്നും മിസ് വേൾഡ് സംഘാടകർ പ്രസ്താവനയിൽ അറിയിച്ചു. ഹർനാസ് കൗർ സന്ധു മിസ് യൂണിവേഴ്സ് 2021 കിരീടം നേടി ദിവസങ്ങൾക്ക് ശേഷമാണ് പ്രഖ്യാപനം വന്നത്. 21 വർഷത്തിന് ശേഷമാണ് ഇന്ത്യയിലേക്ക് കിരീടം കൊണ്ടുവന്നത്.
2021ലെ മിസ് വേൾഡിൽ പങ്കെടുക്കുന്ന മാനസായി വാരണാസി തെലങ്കാനയിൽ നിന്നുള്ള എഞ്ചിനീയറാണ്. മിസ് ഇന്ത്യ വേൾഡ് 2020 വിജയിയായി അവർ തെരഞ്ഞെടുക്കപ്പെട്ടിരുന്നു. ‘നമ്മുടെ മാനസ വാരണാസി കോവിഡ് പോസിറ്റീവായ മത്സരാർത്ഥികളിൽ ഒരാളാണ്, ഇപ്പോൾ പ്യൂർട്ടോറിക്കോയിൽ ഐസൊലേഷനിലാണ്. അവളുടെ അപാരമായ കഠിനാധ്വാനവും അർപ്പണബോധവുമാണ് ലോക സൗന്ദര്യവേദിയിൽ അവരെ എത്തിച്ചതെന്ന് ‘ മിസ് ഇന്ത്യ ഓർഗനൈസേഷൻ സമൂഹമാദ്ധ്യമത്തിൽ അറിയിച്ചു.
