ശ്രീനഗർ: ജമ്മുകശ്മീരിനെ പരിസ്ഥിതി സൗഹാർദ്ദ മേഖലയാക്കി നിലനിർത്തുമെന്ന് ലഫ്.ഗവർണർ മനോജ് സിൻഹ. ശ്രീനഗറിലെ ഗവർണറുടെ ഔദ്യോഗിക വസതിയായ രാജ്ഭവനിൽ നിന്നും ജമ്മുവിലെ ത്രികുട നഗറിലേക്ക് ആദ്യമായി പൂർണ്ണമായും വൈദ്യുതിയിലോടുന്ന ബസ്സിൽ യാത്ര ചെയ്യുകയായിരുന്നു അദ്ദേഹം.
ജമ്മുകശ്മീർ മേഖല ഭൂമിശാസ്ത്രപരമായി ഏറ്റവുമധികം പാരിസ്ഥിതിക ലോല പ്രദേശമാണ്. വികസനങ്ങൾ നടക്കുമ്പോഴും പരിസ്ഥിതിയെ സംരക്ഷിച്ചുകൊണ്ടുള്ള പ്രവർത്തന ങ്ങൾക്കാണ് മുൻതൂക്കം. സംസ്ഥാനത്തെ വിവിധ പൊതു ഇടങ്ങളെ ജനങ്ങൾക്ക് സ്വസ്ഥമായി വന്നിരിക്കാവുന്ന, കുട്ടികൾക്ക് കളിക്കാൻ സാധിക്കുന്ന, എല്ലാവർക്കും വ്യായാമം ചെയ്യാൻ സാധിക്കുന്ന ഇടങ്ങളാക്കി മാറ്റുന്നതാണ് ഒരു പ്രധാന ദൗത്യം. ദത്തെടുക്കാം ഒരു ഉദ്യാനം എന്ന പദ്ധതി പ്രാവർത്തികമാക്കുന്നതിന് പിന്നിലെ ഉദ്ദേശം ഇതാണെന്നും മനോജ് സിൻഹ പറഞ്ഞു.
പ്രധാനനഗരങ്ങളിൽ വൈദ്യുതിയിൽ ഓടുന്ന പൊതുവാഹനങ്ങളും സ്വകാര്യവാഹനങ്ങളും പ്രോത്സാഹിപ്പിക്കും. അന്തരീക്ഷ മലിനീകരണം പരമാവധി കുറയക്കേണ്ടത് ജമ്മുകശ്മീർ മേഖലയുടെ സൗന്ദര്യം കെടാതെ കാത്തുസൂക്ഷിക്കാൻ അനിവാര്യമാണെന്നും സിൻഹ ചൂണ്ടിക്കാട്ടി.
