തിരുവനന്തപുരം: കെഎസ്ആർടിസി ബസ്സിൽ കേരളത്തിലേക്ക് കടത്താൻ ശ്രമിച്ച കള്ളപ്പണം പിടികൂടി. രേഖകളില്ലാതെ കടത്താൻ ശ്രമിച്ച 72 ലക്ഷം രൂപയും വിദേശ കറൻസികളുമാണ് പിടികൂടിയത്. പണം കൊണ്ടു വന്ന ആദം (42) എന്നയാളെയും കസ്റ്റഡിയിലെടുത്തു.
ചെന്നൈ സ്വദേശിയാണിയാൾ. കളിയക്കാവിള ചെക്ക്പോസ്റ്റിൽ വെച്ച് എക്സൈസ് സംഘമാണ് പണം കണ്ടെടുത്തത്. അതിർത്തിയിൽ നടത്തിയ വാഹനപരിശോധനയ്ക്കിടെയാണ് കെഎസ്ആർടിസി ബസ്സ് യാത്രക്കാരനായ ആദമിന്റെ കയ്യിൽനിന്നും പണം കണ്ടെടുത്തത്.
ക്രിസ്മസ്-ന്യൂഇയർ ആഘോഷങ്ങളുടെ ഭാഗമായി സംസ്ഥാനത്തേയ്ക്ക് കടത്താൻ സാധ്യതയുള്ള ലഹരിക്കടത്ത് പിടികൂടുന്നതിനായുള്ള വാഹനപരിശോധനയിലായിരുന്നു എക്സൈസ് സംഘം. നാഗർകോവിൽ – തിരുവനന്തപുരം റൂട്ടിൽ സർവ്വീസ് നടത്തുന്ന ബസ്സിൽ നിന്നാണ് പണം കണ്ടെടുത്തത്. കൂടുതൽ ചോദ്യം ചെയ്യുന്നതിനായി പ്രതിയെ പോലീസിന് കൈമാറി.
