ഒരു കിലോയ്‌ക്ക് ഒരു ലക്ഷം രൂപ. വില കേൾക്കുമ്പോൾ സ്വർണത്തിന്റെയോ മറ്റെന്തെങ്കിലും അമൂല്യ വസ്തുക്കളുടേയോ ആണെന്ന് കരുതിപ്പോകും. എന്നാൽ അല്ല. ഒരു കിലോ തേയിലയുടെ വിലയാണ് ഇത്. തേയിലയ്‌ക്ക് ഇത്ര വിലയോ എന്ന് കേട്ട അത്ഭുതപ്പെടേണ്ട. സംഗതി സത്യമാണ്. അസമിൽ കഴിഞ്ഞ ദിവസം നടന്ന ലേലത്തിലാണ് പ്രീമിയം വിഭാഗത്തിൽപ്പെട്ട തേയിലയ്‌ക്ക് റെക്കോർഡ് വില ലഭിച്ചത്. തേയിലയുടെ പൊന്നു വില കേട്ട് അന്തം വിട്ടിരിക്കുകയാണ് ചായ പ്രമികൾ. 99,999 രൂപയ്‌ക്കാണ് ഒരു കിലോ തേയില ലേലത്തിൽ പോയത്. അതായത് ഒരു ലക്ഷത്തിന് ഒരു രൂപ മാത്രം കുറവ്.
അസമിലെ ദിബ്രുഗഢിലെ എസ്റ്റേറ്റുകളിൽ തേയില കൃഷി ചെയ്യുന്ന മനോഹരി ടീ എസ്റ്റേറ്റ്, സൗരവ് ടീ ട്രേഡേഴ്സ് എന്ന കമ്പനിയ്‌ക്കാണ് തേയില വിറ്റത്. ഗുവാഹത്തി ടീ ലേലകേന്ദ്രത്തിൽ നടന്ന ലേലത്തിലാണ് തേയിലയ്‌ക്ക് റെക്കോർഡ് തുക ലഭിച്ചത്. ഇന്ത്യയിൽ ലേലത്തിൽ വച്ചിരിക്കുന്ന ഒരു തേയില ഇനത്തിന്റെ ഏറ്റവും ഉയർന്ന വിലയാണിത്. റെക്കോഡ് വില സമൂഹമാദ്ധ്യമങ്ങളിലും ഇപ്പോൾ ചർച്ചാവിഷയമായി.
എന്നാൽ ഇതാദ്യമായല്ല കമ്പനി റെക്കോർഡ് വിലയ്‌ക്ക് തേയില വിൽക്കുന്നത്. നാല് വർഷമായി ഏറ്റവും ഉയർന്ന മൂല്യമുള്ള തേയില എന്ന റെക്കോർഡ് സ്വന്തമാക്കുന്നത് മനോഹരി ഗോൾഡ് ടീ തന്നെയാണ്. 2020 ഒക്ടോബറിൽ നടന്ന ലേലത്തിൽ 75,000 രൂപയ്‌ക്കാണ് ഇവർ തേയില വിറ്റത്. 2019 ൽ കിലോയ്‌ക്ക് 50,000 രൂപയായിരുന്നു. 2018ൽ, കിലോയ്‌ക്ക് 39,001 രൂപയ്‌ക്ക് തേയില വിറ്റു. പ്രീമിയം ഗുണനിലവാരമുള്ള സ്പെഷ്യാലിറ്റി ചായയ്‌ക്ക് ഉപഭോക്താക്കളിൽ നിന്നും പരിചയക്കാരിൽ നിന്നുമുള്ള ഉയർന്ന ഡിമാൻഡിനെ അടിസ്ഥാനമാക്കിയാണ് ഞങ്ങൾ ചായ നിർമ്മിക്കുന്നതെന്നാണ് മനോഹരി ടീ എസ്റ്റേറ്റ് ഉടമ രാജൻ ലോഹ്യ പറയുന്നത്.
200 വർഷമായി തേയില കൃഷിയിൽ മുൻപന്തിയിൽ നിൽക്കുന്ന പ്രദേശങ്ങളിൽ ഒന്നാണ് അസം. അസം തേയില ലോകത്ത് തന്നെ കീർത്തിയാർജ്ജിച്ച ഒന്നാണ്. റിപ്പോർട്ടുകൾ പ്രകാരം, 2016-17ൽ 17.41 കോടി കിലോ തേയില ഗുവാഹത്തി തേയില ലേല കേന്ദ്രത്തിൽ വിറ്റു, 2017-18ൽ 18.44 കോടി കിലോ, 2018-19ൽ 18.29 കോടി, 2019ൽ 16.22 കോടി കിലോ എന്നിങ്ങനെയാണ് വിറ്റഴിഞ്ഞ കണക്കുകൾ. ഗുവാഹത്തി തേയില ലേല കേന്ദ്രത്തിന് കീഴിൽ ആകെ 1241 തേയിലത്തോട്ടങ്ങളും 244 ഉപഭോക്താക്കളും രജിസ്റ്റർ ചെയ്തിട്ടുണ്ട്.
അങ്ങനെ ഇന്ത്യയിൽ മാത്രമല്ല അസമിൽ നിന്നുളള തേയിലത്തോട്ടത്തിന്റെ കീർത്തി ലോകമാകെ പ്രചരിക്കുകയാണ്‌. ഏറ്റവും ഗുണനിലവാരമുള്ള തേയില നിർമ്മിക്കുന്നതിൽ മുൻനിരയിലാണ് അസമിലെ തേയില തോട്ടങ്ങളെന്ന കാര്യത്തിലും തർക്കമില്ല.
